Корзо в Лабовій

Сандецкій Штетль соспільна орґанізация, яка намагат ся сохранити памят о многокультурове минуле сандецкой землі, просит тым разом на Лемковину. 21 мая т.р. в Лабовій пройде ІІІ Історичне Корзо.

Давно, Лабова мала право орґанізувати 9 ярмаків до рока. В селі находит ся грекокатолицка мурувана церков Покровы Пресвятой Богородиці з 1784 р., римокатолицкій костел, выбудуваний в 1934 р., і жыдівскій теметів з сохраненыма старыма мацевами. В Лабовій вродил ся єден з найвызначнійшых русиньскых писменників, новинарів і політичных діячів Димитрий Вислоцкій (Ваньо Гунянка).

По селі буде проводила і розповідала про історию авторка моноґрафіі Лабовой і місцева соспільна діячка – Целина Цемпа. Стріча охочых дознати ся і видіти лабівскы культурны памяткы – в неділю, 21. мая 2017 р., при культурным домі, одкале участникы перейдут ґу кіркутови і лемківскій церкви.