Крениця спілорґанізатором ІІІ Европейскых Ігр «Краків-Малопольща 2023»

Гірскы змаганя в бігах, змаганя в бойовых спортах і змаганя на біциґлях MTБ, то конкуренциі, якы мают пройти в Креници вчас ІІІ Европейскых Ігр «Краків-Малопольща 2023». Курорт буде спілорґанізатором подіі. «То буде найвекша подія в істориі Малопольщы, кєд іде о спортову подію» – подає Пьотр Рыба, бургомайстер Крениці.

Власти Крениці од раз приняли запрошыня до ґрупы партнерскых міст Европейскых Ігр. Як підкрислят бургомайстер Пьотр Рыба, на участи в тій подіі курорт може лем зыскати. Покликал уж робочу ґрупу, котра займе ся орґанізацийныма справами, готельовом базом і безпеком спортовців.

В змаганях, котры проходити будут на обшыри ґміны і міста, участ возме 5 тис. самых спортовців. «То велика шанса на промоцию і розвиток міста, а при нагоді здобытя середків на поправу інфраструктуры. То шанса на новы інвестициі» – додає бургомайстер.

Власти подают, што Крениця уж є готова до орґанізациі змагань. Довкола курорту є вельо пути дедикуваных біговым видам спорту, а тіж роверистам. Лем того рока оддали до хоснуваня 120 км біциґльовых трас. Конечны будут лем невеликы роботы в ледовій гали, де проходити будут змаганя в бойовых спортах. Треба буде заінсталювати вентиляцию, купити паркєт, рінґ і маты.

Власти Малопольского Воєвідства запросили до спілпрацы тіж Тарнів і Закопане. В будучым тыжни вести будут черговы детальны бесіды медже Маршалківскым Урядом а самоурядами.

Фот. Krynica.pl