Голосник

Крижевацька єпархія має нового єпіскопа

У віторок 8-го септембра 2020-го року Папа римскый Франціск призначів за нового єпархіалного єпіскопа Крижевацькой ґрекокатолицькой єпархії дотеперішнього апостольского адміністратора sede vacante отця Мілана Стіпіча. Інформовав о тім портал Vatican News.

Владыка – номінант Мілант Стіпіч народив ся 28-го децембра 1978-го року в місті Новый Град в Босні і Герецеґовині. По закінчіню Загребской ґрекокатолицькой семінарії быв у 2003-ім році рукоположеный на священика. 18-го марца 2019-го року быв призначеный за апостольского адміністратора Крижевацькой єпархії, по тім, што з уряду єпархы одышов владыка Микола Кекіч.

Крижевацька єпархія, котра має і русиньскых віруючіх, была основана у 1777-ім році, і є про ґрекокатоликів різных народностей, котры жыють на теріторії Хорватії, Словенії а Босны і Герцеґовины.  На початку 21-го столітя з той штруктуры одокремили ся дві єпархії – Єпархія Успенія Пресвятой Богородіці в Македонії і Єпархія святого Николая в Сербії, котра має свій центер в Руськім Керестурі.

Історічным центром єюпархії є місто Крижевці в централній Хорватії, де і є Катедралный собор Пресвятой Тройці. Уряд єпархы і семінарія є днесь у столиці державы Загребі. Крижевацька єпархія мала за даныма із 2018-го року понад 21 тісяч віруючіх, 46 парохій, котры обслуговало 37 священиків, а в єпархії было і 40 монахынь.

Крижавацька єпархія доста помагала Ґрекокатолицькій церькви у бывшій Чехословакії, коли зістали ґрекокатоликы без єпіскопа і комуністічны власти не хотіли позволити выменованя нового єпіскопа. Втогды крижевацькый єпарха Славомір Мікловш шторік приходив до Пряшова, жебы рукоположыти новых священиків втогдышньой Пряшівской ґрекокатолицькой єпархії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі