Квалифікациі до «Rusyn Cup» в Войводині

В найблизшу суботу, 27. січня/януара в Рускым Керестурі, пройдут квалифікакциі до футбольового турніру «Rusyn Cup». По квалифікациях в Войводині і другых містах, фінал цілых змагань пройде на Словациі.

Турнір «Rusyn Cup» орґанізуваний є од пятьох років. До той поры проходил лем в границях Словацкой Республикы. Орґанізаторы же задумали тым разом розшырити обсяг турніру. Того рока, перший раз квалифікацийны змаганя пройдут тіж в Войводині, серед тамтышніх Русинів.

Першы квалифікациі на Словациі проходили початком грудня/децембра 2017 р. в Братиславі. Другым містом, в котрым мают одбыти ся квалифікациі, є як раз Рускій Керестур в Сербіі. По тых локальных змаганях выявит ся футбольова команда, яка пак возме участ в великым фіналі, якій одбуде ся в марци в Братиславі.

Дальшы міста на мапі турніру «Rusyn Cup» то квалифікациі 11. лютого/фебруара т.р. в Гуменным, а тыжден пізнійше в Сабинові. Поєдны команды можут складати ся од 5-9 грачів, предовшыткым з Русинів. До єдной квалифікацийной розгрывкы може приголосити ся максимально 8 дружын, спосеред котрых найліпшы стрітят ся в великым фіналі. 

Орґанізаторы підкрисляют факт, же з рока на рік до турніру хотят ся приголосити інчы міста, в котрых жыют Русины, прото в слідуючых едициях находят ся команды з інчых місцевости Словациі, а тепер тіж Войводины. Подію рыхтує общество Молоды.Русины.