КВІ Бескіды спустив сайт з датабазов присвяченов діям І. світовой войны

Як інформовав Клуб воєньской історії Бескіды, з підпоров Пряшівского самосправного краю подарило ся му зреалізовати вебсайт, котрый обсягує датабазу місць і дій повязаных з Першов світовов войнов.

„Пригранічны окресы днешнього Пряшівского самосправного краю представлюють єдину область на Словакії, де почас Першой світовой войны проходили прямы бої. Лінія фронты в Карпатах притім ішла од Бардейова по Снину,“ пише в короткій інформацї клуб.

„Почас семох місяців – од новембра 1914-го до мая 1915-го року, тота теріторія стала бойовов теріторійов цілоевропского значіня з вызначныма стратеґічныма дослідками на далше проходжіня войны на выходній фронті. Тутешні бойовы операції выжадали собі жывоты понад 50 тісяч вояків австро-угорьской, російской і німецькой армії, далшых може 250 тісяч вояків было зраненых або попали до пліну.“

Як Клуб воєньской історії далше написав, доднесь в реґіоні северовыходной Словакії сохранило ся веце воєньско-історічных памяток. Найзнамішыма суть войновы цінтері, сохранили ся і різны памятникы, історічны будинкы або обєкты, котры суть повязаны з даным періодом.

„Вдяка підпорі Пряшівского самосправного краю подарило ся зреалізовати вебсайтову датабазу, котра на єднім місці презентує місця повязаны з діями Першой світовой войны.“

Новый сайт, котрый є на адресі www.ww1.sk, обсягує основны інформації о тых локалітах, як і мапу. Навщівник реґіону собі так може допереду зробити план свого путованя по памятках конфлікту з років 1914 аж 1915.

Клуб воєньской історії Бескіды підкреслив, же даны в датабазі ся доповнюють о далшы інтересны місця, як і о новы фотоґрафії ці інформації. Сайт має моментално словацьку і анґліцьку верзію.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА