Кєрмеш на Покрову

19. жолтня т.р. в православній церкви Покровы Пресвятой Богородиці во Львові, тзв. лемківскій церкви, проходил перший фестіваль Кєрмеш на Покрову – фестіваль духовной і народной лемківской музыкы, орґанізуваний з нагоды праздника Покровы.

Церков Покровы Пресвятой Богородиці во Львові называна є лемківском раз з огляду на тото, же єй архітектура мала быти взорувана на єдній з лемківскых церкви (подля єдных была то церков в Рыхвалді, подля другых в Команьчы), до того часу церков была уж перебудувана, а два – єй парафіянами сут депортуваны в сороковых роках минулого столітя Лемкы і іх потомкы. Юрко Федів з Львівского Ставропігійского Братства св. ап. Андрия Первозваного, соспільний діяч і головний орґанізатор кєрмешу, хоц сам о собі бесідує, же є бой-Бойком, хотіл, орґанізуючы тот фестіваль, підтримати іщы тото лемківскє што остало ся серед депортуваных Лемків, звертаючы єднак увагу, же в векшости, окрем памяти про лемківскє, того лемківского уж на жаль неє. Жебы присутны на кєрмешы почули дакус більше лемківского слова як лем зо співанок, орґанізатор постарал ся, жебы бесідуване слово конферансиєрів было двоязычне – по лемкіскы заповідала выступуючых Ліля Плахтій, якой обоє родиче были депортуваны з Лемковины, а по украіньскы слово до публикы кєрувал Юрко Федів. За сценарий одповідала Мария Горбаль – знана на Украіні дослідничка Лемковины. З церковном і лемківском пісньом выступили м.ін. парафіяльний хор місцевой церкви, хор сусідньой церкви св. арх. Михала, хор Братства св. ап. Андрия Первозваного, хор храму свв. апп. Петра і Павла, хор парафіі св. Софіі з Золочева і гіст з Польщы – ансамбль карпатской пісні Відимо, якій на тот раз запрезентувал лем русиньско-лемківскій репертуар. Лемківску поезию презентувала Ольга Стефанко.

(фот. орґанізатор)