Кычера одсвяткувала ювілей 25-літя діяльности

В суботу, 27. жолтня/октобра 2018 р., Лемківскій Ансамбль Пісні і Танця «Кычера» орґанізувал ювілейний концерт з нагоды 25-літя діяльности. Парогодинна подія проходила в просторах Ліґницкого Центру Культуры і притягнула чысленну публику.

Ювілейний концерт ансамблю проходил в рамках тырваючой од 22.- 27. жолтня/октобра 2018 р. «Кычерияды над Качавом», культурной акциі, цілю якой было презентувати культуру лемківской меншыны в Ліґници.

Коротка істория

Ювілейний концерт зачал ведучий колективу, Юрий Стариньскій, якій привитал запрошеных гостів. На початок выступил президент Ліґниці, Тадеуш Кжаковскій, якій передал поздоровліня і грамоту на рукы орґанізаторів. Пак Катерина Трохановска і Андрий Прибыла, конферансиєры, прикликали коротку історию Кычеры.

Першу ґрупу Кычеры творили м.ін. члены тзв. західньой ґрупы Репрезентацийного Ансамблю «Лемковина» з Білянкы. Через деякій час Лемковина была поділена на дві ґрупы, єдна діяла в горах, друга на заході. Західня ґрупа пробувала в Ліґници, а вюл ю м.ін. Укач Возняк. Раз на час колектив іздил на зґрупуваня до Білянкы.

Перший склад Лемківского Ансамблю Пісні і Танця «Кычера» творили Мирослава Рыствей, Мирослава Прибыла, Дорота Дутканич, Люцина Новак, Єва Горбаль, Олена Хованец, Йоанна Ленько, Богуслава Ленько, Софія Головяк, Анна Німаш ай Кристина Плясконь. Мужскій склад творили Петро Гробаль (пом.), Петро Косовскій (пом.), Юрий Стариньскій, Петро Стариньскій, Мирослав Дзямба, Марко Возняк, Богдан Цимбаляк, Петро Ядлош, Марко Павчак та Мирослав Мадараш.

Першу капелю творили покійны Семан Гопей, Михал Олеснєвич, Петро Гойняк, Михал Коляр, Владимір Добровскій та днешні гудакы Гриц Поручник і Дарко Кобані.

Ансамбль Кычера як стоваришыня был зареґіструваний 29. квітня/апріля 1991 р. Перший концерт пн. «Кычера» одбыл ся на ліґницкым рынку 9. червця/юнія 1992 р.

Конферансиєры спомнули тіж на покійных членів і працівників Кычеры, якы протягом 25. років причыняли ся до розвитку ансамблю. Были то хореоґраф Кжыштоф Кобиляк, Мария Стариньска, Юстина Мінях, Ольга Поливка і Михал Ковальчык.

Штырі поры рока

Ювілейний концерт поділений был на штырі части. Жытя на Лемковині диктуване было двома важныма сферами в жытю, т.є. церковным календарьом і зміняючыма ся порами рока.

Артисты зачали концерт од літа. В першым бльоку был фраґмент представліня «Собіткы». До каждой з части конферансиєр доповідал по лемківскы спомины старшого поколіня Лемків, якы оповідали, што каждой поры рока робило ся на Лемковині.

Осіння част представила час рекрутуваня до войска. Видіти мож было вербунок – рекрутскій танец. Зимом было веце часу на спільны стрічы. В тым місци колектив представил фраґмент «Федорів» – народного видовиска, якє автентично было записане од найстаршого поколіня Лемків, а проходило м.ін. во Фльоринці ци Білцаревій.

Яр присвячена была дітям. Наймолодшы з ґрупы Кычерка представили традицийны лемківскы забавы, співанкы і танці, якы діти выконували на полянах вчас выпасаня худобы ци гуси.

Вшыткы штырі бльокы переплітаны были співами солистів і хору. В ювілейным концерті выступували і бывшы члены колективу. Гулялы м.ін. танці «Сієр» і «До ходу». Презентуваны были аматорскы фільмы з турне ансамблю по ріжных державах. Про діти выемітуване было слуховиско лемківскых байок.

Наконец з поздоровлінями для ансамблю выступували льокальны самоурядовы власти, представникы деякых лемківскых орґанізаций і інчы запрошены гості.