Кым єст Никыфор Щеціньскій?

«#nikiforszczecinski» то другій сінґєль з кружка «Домашній співник ЕП» дуету Лона і Веббер, котрый свою премєру буде мал неодолга – 17. квітня/апріля тр. Не лем наголовок співанкы одкликує ся до лемківского артисты. В пісні чути мож слова: «nie dopytałem, nie chciałem być wścibski / a może był Łemkiem jak Krynicki».

Твір «#nikiforszczecinski» бесідує історию щеціньского артисты улиці, котрый своі роботы укладал з ґазетовых вытинків, рослин, свічок, цеглы ци плюшовых щурів – вшыткого, што мал під руком. За ґалерию му был парапет і брама камениці, в котрій мешкал. Вмер в 2018 р.

Велика ікона Божой Матери, знищеный ґлобус, стара лямпка, плякаты, дороговый знак, свічнык і вельо інчого ґратя в темным поміщыню. Такым образом зачынат ся новый відеокліп Лоны і Веббера. Тоты і розмаіты інчы предметы хоснувал в своіх артистичных інсталяциях герой гіп-гопового дуету зо Щеціна.

Никыфор Щеціньскій од Никыфора Креницкого

В творі «#nikiforszczecinski» прикликуют мужчыну, котрый роками своі роботы выставлювал на улици, чысто як наш Никыфор – Епіфан Дровняк. Герой відеокліпу псевдонім взял як раз од креницкого Никыфора, котрый малювал на вшыткым, што му впало в рукы, на кавальчыку картону, буд-якого паперя, знищеного зошыта. Подібны елементы до свойой штукы брал і Никыфор Щеціньскій. Нештоденны коляжы выставлювал в выгляді і брамі камениці, де прожывал.

Штука Никыфора то Польща в скорочыню. Про тото співат тіж рапер: «Ni to instalacje, ni to prace, a tyle tu natchnień, tyle tu znaczeń». В роботах Никыфора (Щеціньского) стрічат ся попкультура, фольклор, віра, патріотизм і тяжка штоденніст. На парапеті укладал попри собі знимку актора Дeнєля Крейґа, портрет папы Йоана Павла ІІ ци польску фану.

Никыфор, Варголь, ляйбикы

Никыфор є в творі символом загальні штукы улиці – штукы, котра є вільна од інституций, не потрібує ґалерий, жебы істнувати.

До спілпрацы Лона і Веббер запросили інчого уличного артисту. Відеокліп зреалізувал Люмп – єден з найбарже знаных стрітартовців в Польщы, артиста ґраффіті, творця муралів і інсталяций. І хоц походит з доцяп інчого нурту, подібні як Никыфир, часто в своіх роботах поміщат річы, котры для інчых не сут уж хосенны, сут лишены.

Відеокліп скадат ся з анімуваных деталів, вытинків штоденности. Видиме в ним навязаня до культовой окладинкы з бананом Енді Варголя, сут дівчата позбераны в народны лемківскы облечыня, є картонове представліня самого Никыфора Креницкого. Люмп одтварят на екрані тіж інсталяциі Никыфора Щеціньского. Медже тым вшыткым вказуют ся кольоровы образкы Щеціна – муры і будинкы, на котрых сут ґраффіті.

Автором знимок до відео є Марек Ковальчык, щеціньскій фотоґраф і оператор. Знимкы крутили в просторах щеціньской Freedom Gallery.

Выдавництво «Домашній співник ЕП» дуету Лона і Веббер то першый альбом рапера і продуцента по штырьох роках од часу печатаня «Nawiasem mówiąc».