Лабова – русиньскє село, жыдівскій штетль і польска колонія (І част) – середа, 20.00 год.

Соспільна орґанізация Сандецкій Штетль, яка намагат ся сохранити памят про минуле сандецкой землі, 21. мая т.р. зорґанізувала в Лабовій ІІІ Історичне Корзо. Напомічны в познаваню многонацийонального минулого сандецкой землі были Целина Цемпа, учытелька польского языка, авторка моноґрафій села Лабова і предсідателька Товариства Любителів Лабівской Землі, та Лука Поломскій з Сандецкого Штетля.

В першій части реляциі познаме за топоґрафічным порядком лабівскій рынок, де зосереджало ся економічне жытя села. Потім перейдеме на другій беріг потока – до Камениці, де в тридцетых роках ХХ столітя возникла колонія польскых робітників, а в 1935 р. побудуваний был і римокатолицкій костел. Дальший пут завюл участників на жыдівскій теметів, про котрий мож было дознати ся вельо інтересуючых фактів.

До выселіня в 1947 р. Лабова мала право орґанізувати 9 ярмаків до рока. В селі находит ся грекокатолицка мурувана церков Покровы Пресвятой Богородиці з 1784 р., римокатолицкій костел св. Станіслава і жыдівскій теметів з сохраненыма старыма мацевами. В Лабовій тіж вродил ся єден з найвызначнійшых русиньскых писменників, новинарів і політичных діячів – Димитрий Вислоцкій (Ваньо Гунянка).

фотоґрафувал: Петро Басалыґа