Ластівочка найліпша!

З радістю інформуєме, же діючий при кружку Стоваришыня Лемків в Пшемкові Ансамбль Пісні і Танця Ластівочка переміг вшыткых участників в рамках ХХХІІІ Загальнопольского Конкурсу Традицийного Народного Танця. Подія проходила в минулий вікенд, 14.-15. жолтня/октобра 2017 р. в Тшцяні к. Ряшова.

Конкурс зачал ся в місцевым Ґмінным Центрі Культуры, Спорту і Рекреациі од 9.00 год. в суботу, а його цілю являла ся презентация і документуваня автентичных народных танців ріжных реґіонів Польщы. По вельох дотеперішніх, то наступний успіх лемківского ансамблю з Пшемкова, а єст він тым більший, же была доцінена не лем сама Ластівочка зо своіма танцями, але і Ластівочка як меншынова ґрупа, вказуюча непольску народну культуру. О ден, 15.10, вчас святочной ґалі, одбываючой ся в Воєвідскым Домі Культуры в Ряшові, орґанізаторы вручыли переможцям нагороду.

Шефуючому Ластівочці Євгенови Габурі, цілому ансамбльови і Стоваришыню Лемків, при котрым діє, сердечні ґратулюєме!