Ластівочка стартує до CIOFF
В суботу, 6. лютого/фебруара т.р., діючий при Кружку Стоваришыня Лемків в Пшемкові Лемківскій Ансамбль Пісні і Танця Ластівочка стане перед жырі престіжной орґанізациі CIOFF (Медженародна Рада Фольклорных Стоваришынь, Фестівалів і Народной Штукы). Верифікацийний концерт пройде в шпротавскым домі культуры (початок од 17.00 год.).
ЛАПіТ Ластівочка вчас свого выступу вкаже репертуар бодай з цілой обшыри Лемковины, в тым запрезентує ся з видовиском Лемківскы Очепины, котре в 2013 році принсело Ластівочці успіх на 45. Медженародным Фестівали Фольклору Гірскых Земель в Закопаным. Товды же ансамбль был нагороджений Бронзовым Топорцьом за занятя ІІІ місця (писали сме о тым на нашым портали). Кєд поведе ся перейти іспыты подля цертифікациі CIOFF, буде то дотепер найвекше осягніня пшемківского ансамблю.
Ластівочка то фурт розвиваючий крыла ансамбль, котрий офіцияльні был оснований в 2000 році при пшемкіскым кружку Стоваришыня Лемків. Ґрупа ведена Марґаритом Гербут і Адамом Бочнєвичом, звала ся Кружок. Дебютантскій концерт одбыл ся на запрошыня пароха православной парафіі в Пшемкові, де ансамбль выспівал репертуар лемківскых коляд. Днес Ластівочка чыслит близко 40 членів, на што складают ся гудакы та танцювальна і хорова ґрупы. Од парох років при старшій Ластівочці фунґуют меньшы Ластівчата. Од 9 років ансамбль вєдно з Кружком СЛ в Пшемкові єст орґанізатором Стріч Трьох Поколінь з Лемківском Культуром. Што рока Ластівочці припадат чест зачынати Лемківскы Ватры на Чужыні. В ансамбли співало і грало вельох знаных музыків, м. ін. лідер ґрупы ЛемОН – Ігор Гербут.
Быти членом Медженародной Рады Фолькльорных Стоваришынь, Фестівалів і Народной Штукы то великій престіж. Спосеред лемківскых ансамблів в Польщы, доднес тот успіх досяг лем Лемківскій Ансамбль Пісні і Танця Кычера. CIOFF был оснований в 1970 році во Франциі, а єдным з членів-основателів была Польща. Орґанізация од початку свойой діяльности є членом аґенды Орґанізациі Зъєднаных Наций – UNESCO. Членство в тій орґанізациі приносит вельо хосну, м. ін. завядкы навязаным контактам ґрупа годна выступувати на сценах найдальшых краів світа. Окрем того, член CIOFF єст прошений на найбарже престіжны фольклорны фестівалі на цілым світі.
Долов – Лемківскы Очепины, за котры ансамбль отримал Бронзовий Топорец в 2013 р.
https://www.youtube.com/watch?v=flxK_prlNeU
