Голосник

Лавкы в Крампній, Тихани, Грабі, Реґєтові, Свіржовій і вельох інчых місцях

2020 рік є для Студентского Кружка Бескідскых Провідників в Ряшові вынятковый, бо як раз рівно 50 років тому Кружок был основаный. Для упамятніня той подіі провідникы впали на небанальну думку акциі «50 лавок з нагоды 50. років СКБП Ряшів». Протягом цілого рока помістили 50 лавок в видоковых місцях в Сандецкым і Низкым Бескідах, в Бєщадах і на Погірях.

Лавочкы находят ся головні при туристичных шляках, але не єст то принцип. То місця, де «каждый вандруючый гірскыма путями може сісти, зімати дых, одпочати, дашто зісти. Додатково, натішыти око красом ляндшафту або поспоминати» – чытаме на сайті орґанізатора акциі.

Перше зрыхтували проєкт выконаня солідной, але і легкой до замонтуваня лавкы. Пак Кружок купил потрібне дерево і соспільном роботом його члены зрыхтували 50 лавок. Місця розміщыня лавок выбрали самы провідникы. Дальшом вольонтерском роботом было перетранспортувати, головно на хырбетах вольонтерів, а пак замотнувати деревяны сіджыня.

На каждій лавці находит ся «лоґо 50-літя СКБП Ряшів, а по боках малы табличкы з просьбом, жебы не лишати смітя» – стоіт в комунікаті Кружка.

Першы дві замонтуваны лавкы сут специяльны (означены буквами В і З), бо поміщены в базах Студентского Кружка Бескідскых Провідників в Ряшові, значыт в Студентскій Шатровій Базі в Вислочку та при Студентскій Хыжы в Зындрановій.

Решта розміщена є од Палениці над Жеґєстовом на заході аж по пут до джерел Сану на сході. На пілніч ініциятива сягнула найвысшого верха Стрижівского Погіря – Барда, і Копыстанькы над самым Перемышльом. Лавочкы поміщено м.ін. на Лацковій, Ротунді, Конечняньскій Яворині, Лупківскій Перегыбі і інчых. Іх докладну локалізацию мож легко найти на гевсій мапі.

Провідникы з Ряшова рахуют, што функцийонуваня той малой інфраструктуры операти ся буде о принцип: «схоснуй, вшануй, дай інчым схоснувати», надіют ся тіж, што іх соспільна акция зродит серед туристів позитивны реакциі.

Фот. skpb.rzeszow.pl

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі