Лавреатков літературного конкурзу стала Людмила Шандалова

В пятніцю 29-го децембра 2023-го року в просторах Інштітуту русиньского языка і културы Пряшівской універзіты в Пряшові одбыло ся выголошіня резултатів Літературного конкурзу Марії Мальцовской 2023.

Як інформовала Кветослава Копорова, шефка Сполку русиньскых писателів Словеньска, котрый є орґанізатором конкурзу, на розділ од попередніх років, коли доміновала в конкурзных текстах авторів поезія, тот рік было до конкурзу загнаных веце прозовых творів.

Цілково до Літературного конкурзу Марії Мальцовской 2023 приголосило ся вісем авторів, з них шість послало прозовы, а двоми поетічны творы.

Перше місце тот рік здобыла уж позната русиньска писателька Людмила Шандалова, котра до конкурзу приголосила ся з модерныма приповідками про найменшых. На другім місці скінчіла Марія Шмайдова, яка в конкурзі мала прозовый текст з назвов Осінь на Комарнику, котрый є споминаньом на рокы обидвох світовых воєн, якы засягли русиньскы села.

Посліднім з оціненых є Мірослав Жолобаніч, котрый на третім місці скінчів з прозов про молодшый школьскый вік.

Як вже стало традіційов, урывкы із вшыткых конкурзных текстів будуть публікованы в часописі Русин, як і на сайті Сполку русиньскых писателів Словеньска.

Людмила Шандалова

Людмила Шандалова (1964 р.) має дотеперь выданых пять книжок. Збірку дітячіх стишків Подьте, дїти, што вам повім (2014 р.), прозу Червеный берег (2016 р.) збіркы поезії про діти під назвами Ани бы сьте не вірили (2018 р.) і Напю ся водічкы (2020 р.), а книжку дітячой прозы Маме дома псика (2022 р.). Окрім того написала пять театралных дітячіх пєс.

У 2015-ім році дістала за свій дебут Премію Александра Духновіча за русиньску літературу. У 2017-ім році за прозу Червеный берег уділив їй словацькый Літературный фонд Ціну Александра Павловіча. Перше місце в Літературнім конкурзі Марії Мальцовской здобыла уж в році 2019 і 2021.

У 2021-ім році здобыла їй книжка духовной поезії про діти Напю ся водічкы Ціну публікы в рамках інтернетового голосованя в конкурзі з назвов Книжкы рока Пряшівского самосправного краю 2020.