Лелюхівска церков пошкоджена од сильного вітру

В наслідстві сильного вітру в понедільковый ранок, 11. марця 2019 р., знищена была част церкви св. Димитрия в Лелюхові. На храм впало дерево, якє росло близко при лівій стіні. Шкоды не сут барз великы, так што церков надале може служыти вірным.

Сильный вітер найперше повалил велику липу, яка впала на ліву задню част храму. Пошкоджена была повала над ризницьом на лівым боці. Галуз липы перебила дах і такой вошла до середины церкви. В справі інтервенювали пожарникы з Доброохотной Протиогньовой Стражы з Мушыны-Фольварку, якы забезпечыли знищену част церкви. Част липы, яка надале могла быти загорожыньом для конструкциі святыні, была пожарниками вырізана, жебы в найблизшым часі мож было реконструувати дах і стіны. Церков єст деревяным храмом, котрого стіны сут крыти ґонтом. Дах покрытый єст бляхом. Вітер был на тілько сильный, што як раз галуз перебила мідяну бляху.

Грекокатолицка церков св. Димитрия в Лелюхові вознесена была в 1861 р. Днешнім жытелям Лелюхова служыт як римокатолицкій костел. Єст дочырньом святыньом парохіі св. Йосифа в Мушыні. В 1964 р. была доцінена і вписана до списку памяток. Церков находит ся на малопольскым Пути Деревяной Архітектуры, через што навіщат ю вельох туристів. Храм буде мусіл быти в невеликій мірі оновленый по понедільковій дуяві. Перше был оновляный в 1916-1917 рр., а пак в ІІ половині ХХ ст.

Остатнім часом были стяти липы, якы теоретично могли быти небезпеком для інчой лемківской церкви – православного храму св. Михала в Высовій. Такы діяня не сподабали ся части любилетів Низкого Бескіду, якы жаліли, што высівска церков стратила через тото свою красу і особливый характер. Лелюхівскій примір вказує, што важнійше од гардого краєвиду єст напевно забезпечыня самого храму перед знищыньом.

Додайме, што в остатніх днях в Польщы дули міцны вітры, перед якыма остерігал медже інчыма Урядовый Центр Безпекы, якій высылал відомости СМС з остережыньом про ближучы ся дуявы. Центр апелювал м.ін. о запезбечыня меєтків перед вітром.

фот. Facebook / Лелюхів