Лемківска Творча Осін в памят Меляніі Собин лем в єден ден

В найблизшый вікенд мала подля плянів одбыти ся дводньова тогорічна ХХVII Лемківска Творча Осін, яка присвячена є того рока Меляніі Собин в звязку з 100. річницьом народжыня той выдатной лемківской поетесы.

Поступуюча епідемія справила, што орґанізаторы такой до остатньой хвилі не знали, ци подія напевно буде могла быти одкрыта. На жаль, в звязку з введіньом ґорлицкого повіту до тзв. червеной зоны, подія буде лем єден ден, в неділю.

Без Бортного

Тогорічна едиция подіі в першый ден, в суботу 17. жолтня/октобра, мала одбывати ся в селі Бортне, з котрым повязана є особа Меляніі Собин. Як раз ту вродила ся, а по повороті з выгнаня жыла до смерти тота выдатна лемківска поетеса.

На місцевым цмонтери, де находит ся гріб Собин, мала быти одслужена панихіда. В бортняньскій части проґраму передвидувано так само звдиджаня выставовой салі посвечній культуровому дідицтву села Бортне.

Покля што, лем Ґорлиці

Традицийо од років другій ден Лемківской Творчой Осени проходит в просторах Руской Бурсы в Ґорлицях. Но того рока буде то першый і єдиный ден подіі. Недільна част зачне ся о 15.00 год. звиджаньом Ізбы Памяти Івана Русенка. Пізнійше одбуде ся дальша стріча з творцями і артистичный проґрам.

На зачаток офіцияльной части слово дадур др габ. Олена Дуць-Файфер і Петро Трохановскій, якы приведут біоґрафію Меляніі Собин, котрой як раз того рока выпадат 100. річниця народин (1920-1979). Пак буде стріча з творцями культуры і артистична част, в котрій презентувати ся мают писателі, поеты і артисты з ріжных части Карпатской Руси.

Як інформувал нашу редакцию Петро Трохановскій, подія, на жаль, одбуде ся як раз лем єден ден – в неділю, в Рускій Бурсі в Ґорлицях. Скорше ведучый Стоваришыня Лемків, Андирий Копча, высловлювал надію, што быти може подію даст ся зорґанізувати без ниякых проблемів, но орґанізаторы, маючы на увазі добро творців і присутных, рішыли зорґанізувати лем єден ден Осени.

Присутны на недільній стрічы прошены сут памятати на основны ограничыня і обовязкы звязаны з закрываньом твари.