Лемківска Творча Осін з нагоды 100. річниці смерти Клавдиі Алексович

Стоваришыня Лемків враз з партнерами – Стоваришыньом Руска Бурса в Ґорлицях і Основном Школом в Красній, та медияльным патроном – Медияльном Ґрупом ЛЕМ.фм, сердечні просит на XXIV Лемківску Творчу Осін, котра одбуде ся в дн. 15.-16. жолтня/октобра 2016 р. в Красній (Коростенці) і Ґорлицях. Тогорічна едиция присвячена єст 100. річници смерти Клавдиі Алексович, котра выпадат як раз вчас тырваня Осени.

Лемківска Творча Осін то стріча русиньскых писменників з ріжных обшыри Карпатской Руси, а і тых, котры в своій творчости до Русинів навязуют, маюча уж од парунадцетьох років утверджений формат, складаючий ся на дводньову подію. Перший ден проходит в місци, котре звязане єст з подійом, або річницьом, а на другій ден подіі літераты і выступлюючы артисты сходят ся в ґорлицкій Рускій Бурсі, де од років проходит завершыня стрічы з русиньском літературом в рамках Лемківскых Творчых Осени. Як примір мож подати влонишню едицию, котра зачала ся в Камяній, будучій місцьом народжыня Миколая Малиняка (в 100. річницю його траґічной смерти в Талергофі), або Осін з 2014 р., яка свій початок мала в Тыличы, а навязувала до сотной річниці початку єдной з русиньскых ґеєнн ХХ ст. – Талергофу. До Красной русиньскы літераты придут уж другій раз, понеже там проходил перший ден XVIII Лемківской Творчой Осени в 2010 р., котра присвячена была двойній річници – 120. народжыня і 50. смерти Івана Русенка. При тій нагоді в ґорлицкій Рускій Бурсі проходило одкрытя Ізбы Івана Русенка і промоция книжкы «Русенко – Выбране» під редакцийом Петра Трохановского, будучой найполнійшым дотепер выданьом поезиі, прозы, драмы і ґрафікы нашого Учытеля.

Того рока до Красной і Ґорлиц запрошены сут писменникы з Польщы, Словациі і Украіны, а музычну част подіі выполнят ученикы основной школы в Красній, ансамбль Терочка, діючий при Рускій Бурсі, Леся Мацьків-Ґорлицка і ансамбль Дуляровы Братя. Выступы літератів і музыків будут попереджены прелекциями др габ. Олены Дуць-Файфер о жытю і творчости Клавдиі Алексович.

Клавдия Алексович (*30.11.1830 – +15.10.1916) народила ся в селі Красна (Коростенка), на лемківскым етнічным острові на пілніч од Коросна, на 60 років до народжыня в тым же селі нашого великого Учытеля І. Русенка. Была дівком місцевого грекокатолицкого пароха о. Йоана Алексовича і Терезиі з Трохановскых. В молодых роках осиротіла, а єй выхованьом занял ся дідо, перемышльскій єпископ Тома Поляньскій (родом з Бортного на Лемковині), завдякы чому мала нагоду ся вчыти, што на тот час не было загальнодоступным для жен. Основала і діяла в єдных з першых женьскых орґанізациях, писала творы для діти і дорослых. Достала званя першой дамы лемківской літературы. Похована єст на Лычаківскым Цмонтери во Львові.