«Лемківска забава» на потребы церкви в Бучыні

В суботу, 20. лютого/фебруара т.р., в сельскій світлици в Клембановицях одбуде ся Лемківска забава. Початок подіі од 20.00 год, а вступне выносит 80 золотых. Можлива є скорша резервация столиків. Забаву прикрасит капеля Демай. В ціні білету 3 горячы стравы, закускы та запиткы.

Орґанізаторы заявляют, же дохід з забавы буде переданий на потребы православной парафіі св. Димитрия Солуньского в Бучыні. Послідніма роками бучыньска церков перешла ґрунтовну модернізацию, але фурт сут потрібны фонды на поінчы річы. Вдало ся поставити м.ін новий іконостас та дві золоты бані і змінити повалу. Парафія мала в плянах добудувати до святыні высоку дзвіницю, так жебы церков по части припоминала традицийний західьно-лемківскій стиль сакрального будівництва.

Парафія св. Димитрия Солуньского в Бучыні была основана в 1947 році, а од 1948 р. занимат поевангелицку святыню, котру вірны достосували до служыня за канонами православной церкви. Творят єй выгнаны з Лемковины в 1947 році Русины, головні з такых сел як Білична, Ізбы, Чарна, Брунары, Климківка, Білцарева ци Фльоринка. Днешня парафія чыслит близко 50 родин,  котры жыют в сусідніх селах попри Бучыні. До парафіі причыслены сут тіж два православны цмонтері, єден в спомянутій Бучыні, а другій – в сусіднім Лаґошові Великым, на котрых спочывают Лемкы. При нагоді, не мож забыти про першого пароха бучыняньской парафіі о. Димитрия Хыляка (1865-1955) – твердого Русина, Міністра Внутрішніх Справ в уряді Руской Народной Республикы Лемків.