Лемківскы курорты в смоґу – рапорт НІК

Найвысша Ізба Конторлі – головний і незалежний орґан державной контролі Польской Республикы, опубликувала рапорт про курорты, находячы ся на теритотиі Польщы. НІК заняла ся досліджыньом того, ци поєдны курорты выполняют критериі, жебы дальше мати такій статус, т.є. мати одповідню до критерий чыстіст повітря, воды і інчых климатичных обставин.

Статус курортів має в Польщы 45 місцевости. В новорічным рапорті НІК взяла під увагу 11 з них, котры выполянют тым самым правны і климатично-натуральны вымаганя, жебы быти зачысленыма до той ґрупы. Серед єденадцетьох, котры были сконтролюваны, нашли ся аж 4 курорты з Лемковины, т.є. місточко Мушына, та села Вапенне, Жеґєстів і Злоцкє. Сут они квалифікуваны як гірскы курорты, але НІК ділит другы на підгірскы, надморскы, низинны та окремом катеґорийом сут місцевости, в котрых находиме лічничы торфы і мінеральны воды.

Ізба в своім рапорті признає, же не лем надзір Міністра Здоровля был планний в справі курортів, але тіж вельо занедбаня мож найти по стороні самых ґмін, котры мают обовязок (выникаючий з одповідніх законів) дбати о курорты. Лем ґміна Мушына (в котрій находят ся Злоцкє і Жеґєстів) провела деякы досліджыня взглядом вымагань ставляных курортам. В другых примірах очывидных зандедбань єст більше.

Рапорт не єст позитивний. Никотра з конторлюваных місцевости не выполнила вшыткых пят вымагань, окрисленых для курортів. Аж 10 з 11 курортных місцевости перекрочыло допущену норму звуку: окрем Каміня Поморского, Колобжеґу, Красноброду, Наленчова, Полочына-Здрій, Рабкы-Здрій, посеред них, на жаль, находят ся і штырі курорты з Лемковины (Мушына, Вапенне, Злоцкє, Жеґєстів). Планно выглядат тіж рівен чыстоты повітря. На жаль, никотра з ґмін не вела комплексовых досліджынь, а кєд деякы внутрішні рапорты ся являли, то радше операли ся на тым, што провірили поєдны повіты, а пак переношены на ґмінний простір, што подля НІК є неправильне.

Єдным з внесків, якы вытягнула НІК з проведеной контроли, є загороза для поєдых ґмін, котры не будут вести надзору над курортныма місцевостями під взглядом норм звуку, чыстоты повітря і воды – можут они стратити статус курорту. Дальшы внескы то підняти шыршы, системовы діяня, маючых на ціли порозумліня з Міністерством Здоровля і Міністерством Середовиска што до пізнійшых досліджынь якости курортів в Польщы. НІК зголосила і постуляты de lege ferenda, вказуючы на потребу змін поєдных правных актів, якы сут необхідны в полным і правильным ведіню надзору над курортами та поліпшаню іх якости.

Речена горі ситуация лем вказує на фурт розвиваючий ся проблем головно смоґу, але і чыстоты воды. Фактом, котрий іщы барже чудує, є хоц бы приведіня гев єдной зо статій, яка вказала ся в листопаді/новембрі 2015 рока на нашым портали. Товды же гордили сме ся, же на Лемковині повітря є без застережынь, же Лемкы не мают такого проблему як Краків ци інчы великы міста, в котрых уж товды потверджено проблем шкідливого смоґу. Од тамтой поры минуло дакус більше як рік, а ситуация деякых курортів на Лемковині барз скоро ся погіршыла.

Полний рапорт Найвысшой Ізбы Контроли найдете на офіцияльным сайті орґану. Фот. горі: рапорт НІК.