«Лемківскы спомины» в Ополи

Од найблизшой пятниці, 16. червця/юнія, буде мож в Музею Опольского Шлеска в Ополи видіти выставу пн. Лемківскы Спомины. Єст то фотоґрафічна выстава, будуча єдным з результатів вельолітніх досліджынь над соспільністю Лемків, веденых Антонийом Крогом – етноґрафом, літератом, тлумачом, а при тым і приятельом Лемків. В Музею А. Крог задебютує як автор фотоґрафічных робіт.

Вернісаж выставы, котрого початок то 17.00 год., прикрасит выступ ансамблю традицийного співу «Niezłe ziółka», а по ним одбуде ся стріча з Антонийом Корогом, получена з промоцийом його найновшой книжкы пн. За тамтом гором. Лемківскы спомины. Писменник єст лавреатом чысленных нагорід, в тым: нагороды ім. Романа Райнфуса за особливы успіхы в обшыри захованя локальной культуровой достоменности в Малопольщы, нагороды ім. о. Юзефа Тішнера, а в маю т.р. отримал Історичну Нагороду Політикы в  катеґориі памятників і споминів за свою остатню книжку. Книжка нашла ся серед 66 выдавництв зголошеных до Літературной Преміі Середньой Европы АНҐЕЛЮС.