На осін того рока дванадцетий раз буде признавана Літературна Премія Середньой Европы АНҐЕЛЮС. Серед 66 зголошеных книжок нашла ся єдна позиция присвячена лемківскій темі – то книжка авторства Антония Крога пн. За тамтом гором. Лемківскы спомины.
Літературна Премія Середньой Европы АНҐЕЛЮС то конкурс з прозаторской творчости, презначений для творців з Середньой Европы, выданых по польскы. Можут в ним взяти участ писателі з 21 держав: Альбаніі, Австриі, Білоруси, Босні і Герцеґовины, Болгариі, Естоніі, Литвы, Латвіі, Македоніі, Молдовы, Мадяр, Німец, Польщы, Росиі, Румуніі, Сербіі, Словациі, Словеніі, Украіны, Хорвациі, Чешской Республикы.
Цілю конкурсу єст выріжніня і промоция творців, якы в своіх книжках піднимают сутьовы для сучасного соспільста темы, выкликуют рефлексию, пошырюют знаня о світі інчых культур. Ідеальні вписує ся в тото книжка печатана выдавництвом Іскры – За тамтом гором. Лемківскы спомины авторства Антония Крога.
З єдного боку, брак границ в Европі та свобідне переміщаня ся люди, а і світ на вытягніня рукы за справом постійного доступу до інтернету, ведут до творіня ся єдного ґлобального села, в котрым ріжниці медже соспільствами ся затерают. З другого же – вельо робит ся, жебы зохабити культурову окреміст поєдных наций та етнічных ґруп. Найновша публикация А. Крога піднимат тему лемківской меншыны – народу, якій роками был свідоцтвом вельокультуровости і ріжнорідности в польскій державі, або австро-угорскій імпериі. Пак пришол час ганебного для Польщы фраґменту істориі, коли тота ріжнородніст была знищена – выселіня, поневоліня в явожняньскым лаґрі. В книжці мож почытати о тых, котрым повело ся вернути з выгнаня, о приспособліню ся до неприязных реалий комуністичной Польской Народной Республикы. Єст і о тым, як прібувано орґанізувати на ново соспільно-культурове жытя покаліченого народу – першы концерты Лемковины, лемківскы ватры. О сохраніню того, што для Лемків найціннійше. Кнжика, писана легкым языком, позвалят польскоязычному чытачови дознати ся о привязаню Лемків до свойой культуры, традициі, языка. А вшытко списане і постерігане з перспективы когоси з ззовни, але прецін найблизшого сусіда – Поляка. Дочытати ся мож, як самы Лемкы реаґували на заінтересуваня іхньом культуром чужыма.
Ци книжка За тамтом гором буде нагороджена, дознаме ся в жолтни/октобрі т.р. Перше, 9-особове жырі выокремит з 66 заквалифікуваных публикаций 14 книжок, якы найдут ся в другым етапі, а пак выбере з них 7, якы будут номінуваны до Нагороды.
В 2015 році серед заквалифікуваных до конкурсу книжок нашла ся переведена на польскій язык Карпатія Мароша Крайняка – русиньского писменника зо Словациі. Більше чытайте в архівальным дописі нашого порталю.
Книжка А. Крога За тамтом гором мала свою промоцию в Рускій Бурсі, єст тіж доступна до выпожычыня в бурсяній бібліотеці.
Коментарі