Lemko On Tour – нова ініциятива ЛУТ

Од 12. мая т.р. орґанізаторы змагань в літаню Лемковина Ультра Трейль рушают з новом ініциятивом пн. Lemko On Tour. Од початку орґанізуваня змагань, а того рока буде то іх четверта едиция, заміреным орґанізаторів было быти як найближе літачів, кібіців, товаришучым особам, словом – вшыткым участникам ЛУТ. З рока на рік заінтересуваня змаганями росне. Векше чысло літачів то тіж веце вольонтерів, занимаючых ся змаганями перед, вчас іх тырваня, і по них, зато збільшат ся і потреба доброй і ефективной комунікациі на леніі участникы-орґанізаторы.

Lemko On Tour то цикль стріч в ріжных містах Польщы:

• Краків (12. мая),
• Вроцлав (17. мая),
• Познань (18. мая),
• Варшава (24. мая),
• Ольштин (8. червця/юнія),
• Ґданьск (9. червця/юнія).

Іх цілю є приближыти новым стартуючым, як рыхтувати ся до змагань. О кілько на долгых трасах (150, 70, 80 км) старуют досвідчены літачы, то на коротшых (долгости 30, ци 48 км) часто стартуют особы, котры в долгодистансовых трасах допіро ставляют першы крокы. Додатковом трудністю сут обставины, в якых ся летит, но не лем гориста обшыр, але і тото, по чым ся летит. Трасы не ведут утвердженыма дорогами, а стежками – путями Червеного Бескідского Пути, і земля осіню, коли проходят змаганя, замінят ся в тажкє до сфорсуваня болото. Ци ліпше спинати ся під гору ідучы, а злітувати згоры максимальні скоро, ци фурт летіти єдным темпом? Якы черевікы найліпше провірят ся на млаках? Буде мож ся тото дознати, як і будут омволены темы, звязаны з трасами (іх означньом, реґенерацийныма пунктами), лоґістиком і конечным выпосажыньом каждого літача.

Директор змагань, Кжыштоф Ґайдзіньскі, оповіст тіж о новостях, звязаных з змаганями в 2017 році, а додатково на каждій зо стріч присутний буде специяльний гіст. На першій, яка одбуде ся в Кракові в надходячу пятницю, буде ним Бартош Ґорчыца та Анна Вітковска, котры были першыма на меті найдолшой трасы о долгости 150 км.