«Лемко» в ЛЕМ.фм – середа, 13.00 год.

О чым писали в славній ґазеті для народа – «Лемку»? Хоц буде тому уж веце як 100 років, коли зачали творити тот першый лемківскоязычный двoтыжденник, то вельо справ є фурт актуальных. Якы? Де іх прочытати, кєд то так тяжко доступный материял?

Маме тот скарб зархівізуваный і – што веце – стартуєме з новым проґрамом: «Лемко» в ЛЕМ.фм, в котрым будеме вам «Лемка» чытати.

Выбраны дописы будут премєрово презентуваны в кажду середу о 13.00 год, а повторіня – в кажду суботу о 14.00 год.

Долов пізрийте на першу страну, першого номеру «Лемка» з 1911 рока, а уж заран, 10. липця/юлия 2024 р., запрашаме на перше выданя «Лемка» в ЛЕМ.фм. Буде вельо о грошах, шак то тема, котра анґажує вшыткы головы і все є на часі…