Лемковина збогатит ся о новы стациці, а част буде одремонтувана

Долина рікы Попрад пережывала буде своєрідний ренесанс. Перед двома тыжнями інформували сме о побудуваню новых біциґльовых пути і мостів над Попрадом і прилучыньом доріг з долины Попраду до медженародового шляку EuroVelo11, а тепер вказує ся, же то не конец інвестиций в тым реґіоні.

16 дворців і желізницьовых стаций, якы находят ся попри желіници над Попрадом, буде выремонтуваных, або побудуваных наново. Польска Державна Желізница (PKP) оголосила конкурс оферт на зрухтуваня тых робіт.

Перебудуваны і выремонтуваны будут будинкы, якых част находит ся в лемківскых селах: в Верхомли, два в Жєґєстові, а решта в сусідніх польскых місцевостях: два в Пивничній, в Старым Санчы, Барціцах і Рытрі. В Милику і Зубрику на Лемковині, але і в Ломници Здрою, Млодові, Новым Санчы Бєґоніцах будут побудуваны чысто новы дворці, а в Андриівці, Поворознику і Мушыні змодернізуваны будут елементы малой архітектуры.

ПДЖ (PKP) рахує, же інвестиция буде спілфінансувана з середків Европейского Союзу. Плянуваны ремонты і будовы новых обєктів на трасі Новий Санч-Крениця вписуют ся в більший проґрам, якій має обняти 464 обєкты в цілій Польщы.

Термін складаня оферт минят 12. квітня/апріля т.р., а термін початку фактичной перебудовы/будовы плянуваний єст на ІІ квартал 2018 рока.