Лемкы выстартували на Лемковина Ультра Трейль 2021

«Учутя на меті не до описаня» – бесідує Роман Цюрик, Лісовый Запаленец, котрый того рока першый раз выстартувал в змаганях Лемковина Ультра Трейль 2021. Минулый вікенд по цілый Лемковині, од заходу на схід переміщало ся веце як 1000 спортовців. Побили рекорд на екстермальній трасі 150 км.

Першы аматоры літаня по горах (хоц в тым примірі о аматорці нияк не мож бесідувати) выстартували в Креници уж в ночы з пятниці 22. жолтня/октобра на суботу 23. жолтня/октобра о 1.00 год. на найдолшій трасі, яка чыслит 150 км. Реґуляміновый час, жебы долетіти до меты в Команчы, минял в неділю в полудне. Найскоршый на тій трасі Домінік Ґжондзєль з підкраківскых Дзєкановиц на меті появил ся уж по 16 годинах і 37 минутах. То о 3 минуты скорше як рекорд з 2017 рока, котрый належал до Чеха Віта Отевреля.

«Емоциі сут барз великы»

Лемковина Ультра Трейль® 150 то єдна з пятьох трас можливых до выбраня в тых змаганях в біганю ультра. Є она найдолша і найбарже екстремальна. Інчы долгости то 100 км, 70 км, 48 км (называна Лемко Маратоном) і 30 км (называна Лемко Трейль). Як раз з тым посліднім дистансом рішыл зміряти ся Роман Цюрик з Вірхні над Ґладышовом.

«То был мій першый старт. Моя дівчына стартувала уж в попередніх едициях і так ня заохотила оповіданьом, як то было, же ствердил єм, же і я спрібую своіх сил. Записали сме ся обоє» – оповідат Роман Цюрик. «Тренінґы стрікте під ЛУТ зачал єм робити менше більше 2 місяці перед стартом. Іщы перед записаньом ся зробил єм сой тестове біганя, жебы провірити, ци мій орґанізм єст готовый на таку активніст, і з маршу перелетіл єм 9 км. Подумал єм сой, же як 9 км єм зробил, то і 30 км ся даст» – бесідує.

Разом вшыткы спортовці, якы взяли участ в змаганях на пятьох трасах, пробігли 75 814 км. 24% участників змагань то были жены, 76% мужчыны. О комфорт і безпеку дбало веце як 210 волонтерок і волонтерів та 4 ратівників і парудесят осіб додатковой обслугы.

«Учутя на меті не до описаня. Чловек долітує барз змученый, але як видит допінґ вшыткых довкола, чує спікера, котрый радит Твоє мено і назвиско і загріват зробити остатні метры, то ся достає екстра силы» – оповідат Роман Цюрик. «Емоциі сут барз великы, особливі по перекрочыню той маґічной леніі меты. Чловек товды чує, што зробил добру роботу. Чул єм велику радіст, але тіж гордіст, же ся мі повело докінчыти трасу, мимо же не прирыхтувал єм ся барз солідні» – доповідат Роман. Быти може не є то до кінця правдом, бо Роман, як Лісовый Запаленец, а предовшыткым любитель нашых гір, робит десяткы кілометрів, коли ходит по лісах, горах і долинах, а і до того треба мати кондицию.

«Орґанізаторы заплянували досправды крас трасу на дистансі Лемко Трейль. Моментами ани не хотіло ся летіти дале, ліпше было сісти на горбку і пообзерати нашы крас горы і долины в чудовых осінніх кольорах. Додатково думка, што летит ся по теренах Лемковины – нашых теренах, спричыняла, што фактичні тоты змаганя были особливо маґічны» – ділит ся своіма пережытями Роман Цюрик. Як на першый старт, Роман закінчыл го на высокым, бо 67 місци на веце як 200 стартуючых.

«То велика приємніст і гонір»

Вєдно з Романом на дистансі 30 км выстартувало пятеро Лемків, а то: Михал Феленчак, Роман Жыла та Лукаш Кулик. Вшыткы ся добрі знают, але аж пред змаганями вказало ся, што будут вєдно міряти ся з десятками кілометрів. «Пізнійше вказало ся, што єст нас іщы веце і на інчых дистансах. Є аж і ґрупа Русин-Лем Лемківска Бігова Ґрупа, котра зосереджат вшыткых лемківскых бігаючых і під котром мож записувати ся до старту. Того рока в ЛУТ взяли участ іщы Кристиян Трохановскій і Влодек Перун на дистансі 100 км, Каміля Трохановска на 48 км та Матеуш Бубернак на 30 км» – дополнят Роман Цюрик.

Плян был, што ґрупа з Лемко Трейль (30 км) выстартує разом, але потім каждый буде летіл в своім темпі. Каждому з Русин-Лем повело ся докінчыти змаганя. На трасі 100 км Кристиян Трохановскій занял 52 місце, a Владимір Перун 67 на близко 140 осіб, якы выбрали тоту трасу.

Роман Цюрик уж рішыл, што о рік буде хотіл зміряти ся з Лемко Маратоном (48 км). «Очывидно вяже ся тото з поважнійшым тренінґом і рыхтуванями, але уж тепер знам, што вартат. Летіти ЛУТ то велика приємніст і гонір, што в такій спосіб можеме репрезентувати Лемків на так знаній імпрезі. Заохочам каждого!» – кінчыт Роман Цюрик.