Голосник

Лемкы вчера і днес

22. мая в Новым Санчы буде проходила стріча пн. Лемкы вчера і днес. Інституция Сандецкій Штетль, яка діє в рамках Фундациі Номіна Розе, рішыла посвятити 2016 рік лемківскій меншыні, зато речена стріча буде першом з заплянуваного більшого циклю – Лемківскы Дорогы / Łemkowskie drogi.

Вчас начальной стрічы прелеґентком буде Барбара Балус з Польского Туристично-Краєзнавчого Товариства Новий Санч (ПТКТ), яка розповіст про колишніх сандецкых Лемків. В другій части заплянувано бесіду на тему лемківской сучасности. Дискутувати будут: Юлия Дошна (лемківска піснярка), Петро Дроздзік (фотоґраф), Ганя Фурман та Лукаш Поломскій з Сандецкого Штетля, орґанізатора подіі. Стрічу прикрасит выступ ансамблю Зорюшка. Артисты той ґрупы інспіруют ся лемківском музыком.

Стріча зачне ся од 18.00 год. в храмі євангелицко-ауґсбуржской парохіі Преображыня Господнього в Новым Санчы (ул. Піярска 21). Вступне на імпрезу – дармо. Спілорґанізаторами стрічы сут: Стоваришыня Професийного Самоуряду, Педаґоґічна Воєвідска Бібліотека в Новым Санчы та Фундация Номіна Розе.

Сандецкій Штетль то проєкт реалізуваний Фундацийом Номіна Розе, якого цілю єст приближаня жытелям сандецкой землі культуры, реліґіі та істориі Жыдів. В рамках своіх діянь хотят вказати материяльний і духовий вклад жыдівскых жытелів в розвиток Нового Санча. Окрем того, Сандецкій Штетль то тіж істория і традиция інчых нацийональных і реліґійных меншын, якы замешкували сандецку землю: Лемків, Ромів, ци протестантскых спільнот.
lemky-wczera-dnes-plakat

Фото горі: Демко Новак

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі