ЛемОН – уж в неділю в Мушыні!

З початком червця/юнія зачала ся 12. едиция Фестівалю Музыка Заклята в Дереві, котра в текучым році розтягнена єст в часі на три місяці концертовых подій. То фестіваль, котрий уж міцно закоренил ся в Малопольщы, каждого рока притігаючы до памятковых обєктів Пути Деревяной Архітектуры чысленных любителів музыкы. Єй фінал з ансамбльом ЛемОН заплянуваний на найблизшу неділю в курортным місточку Мушына.

Тогорічна едиция фестівалю проходит в звязку з 15. річницьом вписаня деревяных костелів та 5. річницьом вписаня деревяных церкви на листу Світовой Спадковины ЮНЕСКО, зато і концерты проходили во вшыткых тых обєктах. Як все, проґрам є так задумуваний, жебы публика могла стрітити ся з артистами, якы презентуют ріжны музычны жанры ци стилі, як тіж окремы музычны темы. Почути мож было клясичну музыку, розмаіты інтерпретациі корінной, традицийной музыкы, джазовы інтерпретациі і авторску творчіст артистів молодого поколіня. Фестіваль завитал і до лемківскых сакральных обєктів. Того рока музычны акциі проходили в церкви св. Параскєвы в Квятони, церкви св. Якова в Поворознику, церкви Покровы Пресвятой Богородиці в Рыхвалді і в церкви св. Михала в Брунарах.

Амбасадорком лемківской музыкы по інчы рокы была Сусанна Яра, котрой каждий з выступів выкликувал великє порушыня. Того рока русиньскій репертуар выспівала 29. липця/юлия в костелі свв. Апостолів Филипа і Якова в Санковій вокальна ґрупа Відимо з Санока, в репертуарі котрой находят ся пісні з цілой карпатской обшыри.

Міцным закінчньом, а і великом нагодом для любителів творчости Ігоря Гербута, буде концерт його ансамблю в найблизшу неділю. 26. серпня/авґуста молодий, але шыроко нагороджуваний і популярний лемківскій композитор, інструменталиста і вокалиста выступит враз з ансамбльом ЛемОН в амфітеатрі Запопрадя в Мушыні.

Фото: пресовы материялы