ЛемОН зас на Лемковині!

Уж неодолга на Лемковину загосит ансамбль з лідером-вокалистом, котрий єст одповідальний за єдну з найшыршых в остатнім часі лемківску пропаґанду. Іде, очывидно, о ансамбль ЛемОН з Ігорьом Гербутом як фронтменом, якій все в даваных собом інтервю шмуґлює даякы інформациі про тото, же єст Лемком і што ся з тым вяже. А в звязку з тым, же ґрупу слухают і слідят тисячы, кєд не соткы тисячів любительів, інформация про вшытко, што лемківскє, іде в світ барз міцно.

Другій рік запоряд ЛемОН бере участ в орґанізуваній містом Крениця-Здрій подіі під назвом «Крениця Джерелом Культуры – фериі полны культурных емоций». 6. лютого/фебруара в будинку Головной Пияльни даст свій концерт.

Кінцьом минулого рока ЛемОН выдал альбом «Скарлет», кторий по нецілых двох тыжнях достал званя плятиновой платні. Концерт буде нагодом, жебы почути і тоты співанкы нажыво. Окрем того, як несподіванку, ансамбль хвилю перед різдвяныма святами выпустил кружок «Зимова Етюда», на котрым поміщено коляды і щедрівкы, співаны в вельох языках, серед котрых не молго бракнути і лемківского, а тіж пару авторскых зимовых співанок. Та певно і дакотры з тых творів почути буде мож на лютовым коцнерті в зимовій Креници.

Ґрупу актуальні творит шестеро музыків о ріжных етнічных корінях, якы походят з ріжных кінців Польщы. Лідером єст, очывидно, Ігор Гербут, найвражливший Лемко зо заходу. За характеристычны славяньскій і мелянхолийний звук гушель одповідат Андрий Олійник, з походжыня Украінец. Малопольщу репрезентує Піотр Валіцкій, якій творит неповторний климат звуками клявішовых інструментів, а міцны і при тым деликатны звукы ґітары то діло Піотра Рубіка, якій выховал ся на Шлеску. За непрестанний та креатывний ґрув [анґ. groove] опдовідат Піотр Колач і бубняр Томаш Гари Вальдовскій.