Літо было в музеях і ґалеріях ПСК успішне наперек коронакрізі

Музеї і ґалерії в Пряшівскім самосправнім краю (ПСК) фунґовали влони з причіны пандемії в обмедженім режімі. То было видіти і на цілковій навщівности за цілый рік. Но наперек скорочіню часу, коли было мож културны інштітуції навщівити, веце з них зазначіло рекорды головно в літніх місяцях.

Як інформовала Леа Геілова з Одділіня комунікації і пропаґації ПСК, навщівность музеїв і ґалерій, котрых зряджовательом є край, была позначена рештрікціями в повязаню з пандемійов. Жупны музеї і ґалерії навщівило понад 357 тісяч людей, но в порівнаню з роком 2019 є то о веце як 188 тісяч навщівників менше.

Наперек тому дакотры културны інштітуції записовали і рекорды. Любовняньскый музей – замок в Старій Любовні у 2020-ім році навщівило головно вдяка успішным літнім місяцям, коли наросла навщівность о 40 процент, довєдна поад 200 тісяч людей. Минулорічна навщівность того музея представлює веце як половину цілковой навщіности вшыткых музеїв і ґалерій, котрых зряджовательом є ПСК.

Прязна літня сезона была і в далшых крайскых музеях. В літніх місях дішло ку перекрочіню навщівности в порівнаню з 2019-ым роком і в Музею модерного уменя Енді Варгола в Меджілабірцях. У Варголовім музею так само як в Любовняньскім музею наросло чісло навщівників о 40 процент. Довєдна у 2020-ім році пришло до той інштітуції веце як 21,5 тісяч турістів.

Вігорлатьскый музей в Гуменнім оцінив літню турістічну сезону в місяцях юл – авґуст 2020-го року за найуспішнішу в своїй історії. В літі в музею было 12 800 навщівників, цілково за рік їх было 17 тісяч. О 11 процент нароснутя зазначів і Крайскый музей в Пряшові. Шарішскый музей в Бардейові было собі посмотрити понад 33 тісяч заінтересованых. Музей в Кежмарку мав майже 32 тісяч навщівників, і до Підтатраньского музею в Попраді завітало понад 5 700 людей.

Татраньска ґалерія в Попраді зазначіла понад 8300, Шарішска ґалерія в Пряшові веце як 6 600 навщівників.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА