Літо привитане по лемківскы

В остатню суботу, 26. червця/юнія 2021 р., одбылo ся привитаня «Лемківского Літа» в Чмели. То каждорічна подія орґанізувана православном парохійом св. Тройці в Любіні, де настоятельом єст о. Богдан Репела.

Літо по лемківскы витали не лем самы Лемкы, але і польскы сусіды, якы дружньо брали участ в зрыхтуваным проґрамі – од спільной молитвы на початок суботнього пополудня по концерты і забавы для діти.

На подію, яка проходила під патронатом Маршалка Нижньошлезского Воєвідства, пришли чысленны локальны самоурядовы власти. Окрем інчых, в подіі на запрошыня орґанізаторів брал участ бургомайстер Хоцянова, Томаш Кульчыньскій. В теплых словах повіл він, же «Лемківскє Літо» єст том імпрезом, яка орґанізує ся на обшыри його ґміны, і то як раз єй собі найвеце цінит і є му найблизша.

Подію фінансово сперли і дальшы інституциі. Окрем Уряду Міста і Ґміны Хоцянів свою поміч дал так само Реґіональный Центр Культуры. Подія не годна бы была ся одбыти, кєд бы не прихыльніст Чмелян і шолтыскы того села – щырой і доброй Лемкыні, Мариі Куземчак.

В проґрамі выступили м.ін. лемківскы ансамблі – молодіжна ґрупа Н’лем фольк з Вроцлавя, ансамбль Файна Ферайна зо Шпротавы і фольклорный ансамбль Розтока з Рудной. Конферансиєром подіі был спілпрацівник нашого радия, Мирко Воргач.

Імпреза была збогачена конкурсами про наймолодшых. Были то конкурсы співу, рецитациі ци малюнку, до котрых приступило вельох з поколіня наймолодшых Лемків. Не бракло і інчых атракций. О пчолах і фаху з тым звязаным оповідал Андрий Прибыло з Лісця.

Сама подія проходила і в патріотичным лемківскым духу, кєд же нашли ся на ній промоцийны материялы повязаны з тырваючым Нацийональным Повселюдным Списом, такы як лемківскы летучкы, плякаты і банеры.