70-літя выселіня Лемків орґанізуване містом Мушына

Товариство Любителів Мушыньской Землі, Музей Мушыньской Державы в Мушыні та Народовий Архів в Кракові просят на конференцию присвячену 70-літю выселіня Лемків з ґмін Крениця і Мушына. Конференция одбуде ся 21. жолтня/октобра 2017 р. о 11.00 год. в Музею Мушыньской Державы на ул. Кривій 1 в Мушыні. Стрічу поведе Сильвестер Ренкас – кєрівник Народового Архіву в Кракові.

Крениця і Мушына то невеликы курортны міста положены попри собі на західніх крайцях Лемковины. Выселіня лемківского населіня в рамках Акциі Вісла з тых ґмін довело в великій мірі до іх польонізациі. Днес в Мушыні уж Лемків такой не найдеме, зато до Крениці вернуло ся вельо лемківскых родин. Мож повісти, же Крениця то днеска єден з центрів лемківской культуры. Днес (за неофіцияльныма даныма) в Креници і околицях може жыти близко 1000 Лемків. То ту мешкат і творит найвыдатнійший лемківскій творця, Петро Мурянка.

І до выселіня з Креницьом і Мушыном были звязаны важны персоны лемківского світа. В Креници вродили ся знаны Русины, м.ін. митрополита Йосиф Сембратович (1821-1900), Епифан Дровняк (знаний шырше як Никыфор Креницкій, 1895–1968), выдатний лемківскій представник наівной штукы. В Креници діял Методий Трохановскій (1885-1948), діяч і єден з основателів Лемко-Союза, переслідуваний польскыма властями за прихыльніст Рускій Народній Республиці Лемків, а потім НКВД, автор першых в меджевоєнным періоді учебників до наукы лемківского языка і ініциятор введіня лемківского языка як предмету до систему основного шкільництва в 30 рр. ХХ столітя. В Креници і в Мушыні свою професийну діяльніст вели тіж  др Ярослав Качмарчык (премєр уряду РНРЛ), др Орест Гнатишак і др Александер Гнатишак, сынове креницкого пароха о. Гавриіла Гнатишака, замученого в австрисйкій вязници вчас Віденьского Процесу. Вродженцьом Крениці был Миколай Громосяк, міністер рільництва РНРЛ.