Лося на архівальных награнях проф. Райнфуса

В четвер, 23. лютого/фебруара т.р., в ремізі протиогньовой стражы в Лоси запрезентуваны будут архівальны награня проф. Романа Райнфуса, тыкаючы того мазярского села. Награня, удоступнены через Стоваришыня Народных Творців в Люблині, походят з тереновых досліджынь проф. Райнфуса з 60. років минулого столітя. На доступных товды шпульовых носителях записаны были бесіды з людми зо села, істориі о мазярах, навет і співанкы.

На проєкцию прошены сут вшыткы заінтересуваны темом, а особливо жытелі Лося. Початок стрічы то 17.00 год. Реміза находит ся в центрі села, напроти школы. Орґанізатором подіі єст Музей Дворы Карвациянів і Ґладышів в Ґорлицях – одділіня Мазярска Загорода в Лоси.

Проф. Роман Райнфус, котрого награня будут презентуваны, был польскым етноґрафом, знавцьом народной штукы в Польщы та етноґрафіі Карпат, працівником вельох польскых університетів і дослідничых інстутуций, спілпрацувал з ріжныма скансенами і музеями, брал чынну участ в фольклористичным руху в Польщы. Як сам твердил, остал етноґрафом, коли вчас вандрівок в Низкій Бескід захопил ся культуром Лемків. Через більше як 30 років вюл тереновы досліджыня на більшости польской державы, в тым на Лемковині. Єст автором десяток книжок і дописів тыкаючых м.ін. культуры і штукы Русинів в Польщы.

Р. Райнфус был головным пропаґатором основаня в 1968 р. Стоваришыня Народных Творців, якє од тамтого часу занимат ся продолжуваньом народной культуры во вшыткых єй обшырах і популяризуваньом вшелеякых проявлінь аристичной народной творчости. Част діяльности Стоваришыня то ведіня архіву і бібліотекы. Колекция, громаджена од початку істнуваня Стоваришыня (т.є. од 1968 р.), чыслит коло 20 000 тис. зархівізуваных знимок, більше як 5000 награнь відео, 8000 книжок, часописів і інчых публикаций, коло 1000 експонатів народной штукы, а тіж більше як 4000 особовых течок членів Стоваришыня, з якых дознати ся мож про персоналиі і артистичний доробок народных творців. В тым же збірнику находят ся звуковы нарганя, відеозаписы і інчы архівалиі по проф. Райнфусі.

В 2015 р. Фундация Стара Дорога выдала платню пн. Там на горі черешенька. Награня з тереновых досліджынь Професора Романа Райнфуса, на котрій поміщено понад 60 награнь з архіву Стоваришыня Народных Творців.  То рекорды, записаны проф. Райнфусом вчас досіджынь, веденых в 60. роках ХХ ст. на обшыри Лемковины. На платни поміщено 66 наргань, а то співанкы, якы товаришыли Лемкам при ріжных роботах, святах, або стрічах (пастырскы, собітковы, великопістны, весільны, колысанкы, пісні співаны при нагоді крестин, деякых робіт в поли та др.), а тіж фраґменты выповіди м.ін. про страхы, весіля, вечыркы і мазярскы закликы. Выконавцями были особы роджены в кінци ХІХ і початком ХХ ст. Позерайте гев, жебы видіти і почытати книжочку долучену до платні, а за тым мотузком мож одслухати фраґменты співанок.