Любіньскы упамятніня Дня Русинів Польщы

Каждого рока члены Кружка Стоваришыня Лемків прилучают ся до спільнотовых упамятнінь Дня Русинів Польщы, якій призначеный є на ден 5. грудня/децембра – як памятка по славетным всенародным віче, што было в 1918 р. во Фльоринці.

Любіньскы одзначыня свята сут все о тілько вынятковы, што сходят ся такой зо Святом Копальників, якє каждого рока припадат на 4. грудня/децембра (за східнім календарьом то Введіня во Храм Пресв. Богородиці, за західнім то памят св. Варвары). Серед Любінян є вельо копальників, в тым чыслі і серед самых членів любіньского Кружка СЛ.

Тогорічны упамятніня нацийонального свята Лемків для членів любіньского Кружка были інчы – кєд же перед місяцьом Любіняне попращали єдного зо своіх камаратів – бл. п. Януша Квоку. Так тіж з нагоды Дня Русинів Польщы члены оддали чест двом важным особам – бывшым членам Кружка – бл. п. Богданови Ґамбальови (1965-2020) і бл. п. Янушови Квоці (1970-2024). Покійны спочывают на любіньскым теметові.

Святкуваня Дня Русинів Польщы серед членів Кружка СЛ в Любіні сігат його початків – од часу, коли свято было признане Світовым Конґресом Русинів на пропозицию лемківской делеґациі. По смерти Богдана Ґамбаля, традицийом в Любіні стало ся, што каждого рока стоваришакы ішли на цмонтір, штобы оддати чест покійному – вызначному лемківскому діячови, єдному з думкодавців спільнотовых святкувань нашого нацийонального свята, основателя радия ЛЕМ.фм, одданого справам Руской Бурсы в Ґорлицях. Серед тых осіб дотля все был Януш Квока, якій пак передавал нашій редакциі інформациі з одзначыня свята. Покійный Януш Квока вмер 5. листопада/новембра 2024 р.

Любіняне тогорічны спільнотовы одзначыня Дня Русинів Польщы зачали 4. грудня/децембра. Уж в найблизшу суботу, 7. грудня/децембра центральны святкуваня пройдут во Фльоринці і Рускій Бурсі в Ґорлицях.