Голосник

Любовняньскый музей робить на проєктах про гендікепованых

Любовняньскый музей в Старій Любовні робить на двох проєктах про гендікепованы ґрупы жытелів. Як повіла про аґентуру TASR музейна педаґоґічка Олітілія Барликова, першым є сприступніня сканзену і єдной деревяной хыжы на практічны освітні актівности особам з автізмом.

Другый проєкт приближыть жывот на граді почас століть посередництвом ілустрованых приповідок про сліпых, слабозракых і глухых. На тоты проєкты музей здобыв грошы в сумі 11 тісяч евр через ґрантову сістему Міністерства културы Словацькой републікы. Докінчены мають быти до кінця 2020-го року.

Напланованы навщівы і творчі варштаты

Як повіла Барликова про аґентуру, особы з автізмом потребують мати допереду приготовленый план навщівы, котра їх чекать. Зато треба выфотоґрафовати оточіня любовняньского сканзену. Знимкы, котры будуть зображовати візуалну путь про навщівника з автізмом, будуть в правилнім упорядкованю досутпны на вебсайті музея. Вдяка тому собі навщіву будуть годны наплановати і іншы школы ці заряджіня.

Особам з автізмом за словами Барликовой приготовлять і творчі варштаты, де собі будуть годны споробовати традічны ремесла. На тоты актівности буде сприступнена і деревяна хыжа в сканзені.

Ілустрована приповідка про сліпых і глухых

Другый проєкт представлює сприступніня граду Любовня про особы, котры мають постиженый зрах або слух.

„Частьов цілого проєкту є і управа пописів у експозіціях граду методов ясного друку, жебы были легко чітательны нелем про слабозракых, але і про вшыткых навщівників. Експозіції будуть так само доповнены о гаптічны (дотыковы, позн. ред.) моделы збірковых предметів выставленых на граді і доповнены пописами в Браілловім писмі,“ пояснив директор музея Далібор Мікулик.

Музей в рамках того проєкту приготовлює ілустровану приповідку про сліпых і глухых. Тота має приближыти жывот вояків, пивоварників, кухарів, слугів і далшых людей, котры жыли на граді. „Про сліпых буде приповідка коментована говореным словом, про глухых сьме приступили ку хоснованю тітулків,“ доповнив директор.

Музей в Старій Любовні продовжує в успішных проєктах дебарьєрізації граду і сканзену. Вже од 2011-го року сприступнює град і сканзен гендікепованым ґрупам жытелів. За дотеперішню діялность быв двараз нагородженый головнов премійов цілонародного конкурзу Словакія без барьєр.

Жрідло фотоґрафії: Ľubovnianske múzeum.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі