Лючйоля в Новици, значыт роковий табір для старых дівчат

В лемківскій Новици залюбили ся ріжны артисты. Зас стане ся она місцьом альтернативной штукы. Зас, бо не так давно тому скінчыли ся там ІХ Театральны Стрічы Інновіця 2016 – циклічна імпреза, на котру запрашаных єст што рока вельо оффовых театрів з Польщы і заграниці. А тым разом, од половины липця Новиця буде звучала на роково.

Тырвают власні записы до літньой едициі Лучйолі – рокового табору для старых дівчат, як звучыт полна назва табору. Занятя будут проходити через тыжден в двох ґрупах заавансуваня, а ціліст скінчыт ся фіналовым концертом на пленеровій сцені при Новиця 9. Варштаты рыхтуваны сут лем для дівчат, а і занята буде вела женьска кадра. А додатково – неє ниякого вікового ограничыня. Окрем граня на ґітарі, басі, перкусиі та вокальных занять, участничкы табору будут одпочывати і напавати ся духом Лемковины. Табір єст нагодом до зреалізуваня своіх вкрываных і незреалізуваных музычных мрий та вказаня рокендрольового духа. Выступ на сцені, практикуваня в ґрупі – то тіж нагода до поправы певности себе.

Орґанізатором табору єст ґрупа інструкторок, якы приналежат до медженародобой сіти Girls Rock Camps, яка занимат ся головні музычном едукацийом для дівчат в віку 7-18 років. Учытелькы вчат подля специяльной, выпрацуваной в ЗША методолоґіі, завдякы котрій ачий тоты, што не мают досвідчыня в музыкуваню і граню на інструментах сут в силі барз скоро заімати першы принципы гры і уж по пару днях заграти свій перший концерт.

Більше найдете на сайті lucciola.rockcamp.com.pl