Лжычкарство з Новиці - проєкт ҐОК з Устя Руского - lem.fm

Ґмінний Осередок Культуры в Устю Рускым выстарал ся в Міністерства Культуры і Народовой Спадковины о ґрант на проєкт пн. «Лжычкарство в Новици». Буде він реалізуваний в рамках проґраму Культурова Спадковина, Пріоритет: Народна і традицийна культура.

Дофінансувана задача має на ціли сперти тото же ремесло, якє є на днешній час бране за культурову цінніст. Задумане є, жебы сам проєкт довюл до натуральной трансмісиі, тзн. жебы в його рамках особы, якы занимают ся вырабляньом лжыц в селі Новиця, передали тот фах і своє знаня другым, котры возмут участ в реалізуваній задачы. Ремесло має вказувати знаний новичаньскій лыжкар Петро Михняк. Інструктор зосередит ся на безпосереднім передаваню знаня даякій особі, або ґрупі люди, якы будут істо заінтересуваны вывчыньом ся той професиі. Прото сам проєкт, то не єдна стріча, але по правді є він заплянуваний на долший час, як циклична, повторююча ся задача – так, жебы процес трансмісиі знаня о ремеслі был неперерваний. Наука новичаньского ремесла буде ся одбывала 12 місяців, значыт час, в котрым участникы годны запознати ся з мастерством.

В рамках проєкту заплянувано м.ін. науку будуваня і конструкциі ручных токарок і тзв. дзяда – нарядя, якє хоснує ся до струганя лжыц та будуваня і фунґуваня дальшoго нарядя, котре служыт до вырябляня деревяных лжыц, так традицийным як і машыновым способом. Окрем реченого, особы запознают ся з процесом рыхтуваня дерева, котре в пізнійшым часі послужыт до робліня лжыц. Координатороком проєкту є Реґіна Паздур – особа, вдяка котрій початком 2017 р. был зреалізуваний фільм, оповідаючий історию новичаньскых лжычкарів (о чым інофмували сме гев), якы пропаґуют традицию того ремесла по днешній ден, ачий гордят ся тым фахом через выступуваня на всякых выставах і конкурсах.