Мадярьска презідентка прияла предстоятелів сірійскых церьквей вєдно з метрополітом Філіпом

Як інформовав сайт Ніредьгазькой ґрекокатолицькой єпархії, Ґрекокатолицька метрополітна церьков в Мадярьку єднако як і мадярьскы власти довгодобо утримують односины з хрістіаньскыма церьквами в Сірії.

Потверджіньом того было і приятя предстоятелів сірійскых церьквей, патріархів Антіохії, вєдно з Высокопреосвященым владыком Філіпом Кочішом, гайдудороґскым архієпіскопом і метрополітом Мадярьска, презідентков Каталін Новак.

Мадярьска презідентка стрітила ся з предстоятелями церьквей в пятніцю 17-го марца 2023-го року у своїй пріватній резіденції. Подобна стріча одбыла ся по дакілько роках, кедьже розвиток тых односин так само замаговала пандемія, і остатній раз были предстоятелі сірійскых церьквей на такій стрічі в році 2020.

На стрічі окрім метрополіты Філіпа брали участь Його Блаженость Йоан X., ґреческый православный патріарха Антіохії і цілого Востока, Його Блаженость Юссеф Абсі, мелкітьскый ґрекокатолицькый патріарха Антіохії і цілого Востока, Єрусалима і Александрії, а Його Блаженость Ігнат Єфрем II., сірійскый православный патріарха.

Голова державы запевнила сірійскый і турецькый народ о своїм сочувствію в повязаню з катастрофов, котра была запричінена землетрясіньом, і інформовала, же мадярьскый премєр зажене фінанчну поміч на обновліня зруінованых областей.

Предстоятелі Антіохії высловили вдячность, же Мадярьско і Ґрекокатолицька метрополія в Мадярьску реґуларно помагають морално і фінанціями.

Підкресили, же то про них барз потрібне, кедьже країна є у войні од 2011-го року. Почас землетрясіня девять антіохійскых храмів было цалком зруінованых, три розвалили ся часточно, і майже тісяч хрістіанів зістало без обыстя.

Патріарха Йоан Х. повів, же хрістіанство цалком може у Сірії заникнути, хоць то колыска хрістіанства, бо много родин, котры пришли о стріху над головов, ідуть за граніці. „Церьков – наш дім. Поможте наперед обновити нашы церьки, а пак нашы домы,“ повів на стрічі патріарха.

На кінцю стрічі три головы церьквей Сірії передали подарункы з Дамаску презідентці, а она їм подаровала реформатьскый молитвенник і ЦД Мужского хору святого Єфрема.

По стрічі метрополіта Філіп передав патріархам ікону святого Михаіла, а мелкітьскому патріархови дав і паклик з бавками, котры зробив властноручно ґрекокатолицькый віруючій, і котры были подарованы про сірійскы діти.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА