Мадярьско буде далше блоковати раду НАТО-Україна, покля не вернуть ся права меншынам

Мадярьско буде і далше блоковати стрічі рады НАТО-Україна, покля ся не вернуть на Україні права меншынам. У віторок 10-го марца 2020-го року то повів Петер Сіярто, мадярьскый міністер загранічных діл.

У своїм приговорі в мадярьскім парламенті шеф резорту діпломації повів, же мадярьска позіція є у світовій політічній арені означована як проросійска. Сіярто то означів за абсурдіту. Інформовав о тім портал HUNGARY today.

150 тісяч Мадярів є веце як ґеополітіка

Міністер Сіярто конштатовав, же здалека ся може видіти, же жывот 150-ох тісячів єтнічных Мадярів, котры жыють в Закарпатьскій области Україны, є менше важным як ґеополітічны вопросы.

„Но про нас є тота комуніта омного важніша як будьякы ґеополітічны вопросы,“ цітовав портал мадярьского міністра.

Сіярто так само повів, же в рамках білатералных односин Мадярьска із сусідніма державами, суть його односины з Українов найскладнішыма. „Кедьже Мадярьско підптримує Україну у вoпросах теріторіалной цілости і сувереніты, мусить брати увагу на многы порушованя прав мадярьской народностной меншыны в законодавстві. Порушіня дотулять ся нелем прав мадярьской меншыны, але і прав меншын в шыршім смыслі,“ повів міністер.

Непрямо бісідовав і о языковым законі, котрый быв на Україні приятый. Тот Мадярьско довгодобо крітікує і звертать увагу на то, же зничіть народностне школство.

Ціль забезпаечіти, жебы каждый граждан Україны знав державный язык, і то, жебы народностны меншыны знали бісідовати в їх материньскім языку, бы ся подля Петра Сіярто не мало вылучовати. Конштатовав, же на Україні мадярьскы школярі мають сім годин тыжденно україньского языка, што може быти проблема при тім, жебы ним добрі бісідовати. Но рішіньом бы подля нього было піднятя уровни навчаня україньского языка і Мадярьско є приготовлене помочі фінанцовати такы намагы.

Стрітить ся з україньскым колеґом

Сіярто повідомив, же 26-го марца його україньскый колеґа, новый міністер загранічных діл Україны Дмитро Кулеба, котрого „презідент попросив робити над обновліньом білатералных односин“, навщівить Будапешт. Подля мадярьского міністра суть на то приготовлены і зроблять розумны пропозіції.

На ворпос аґентуры Інтерфакс-Україна, ці Україна переоцінить мадярьскы языковы пожадавкы про народностны меншыны, Кулеба написав, же того часу глядають рішіня, котры будуть одповідны інтересам обидвох держав.

„Мусиме найти рішіня на одблокованя НАТО, наштартованя сполочных інвестічных і інфраштруктурных проєктів з Мадярьском в Закарпатьскій области,“ цітовала аґентура Інтефакс-Україна Дмитра Кулебу.

В марці ся першыраз за сім років одбуде в Будапешту засіданя меджівладной україньско-мадярьской комісії про співпрацу.

Жрідло фотоґрафії: hungarytoday.hu.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА