Мадярьскы Русины на екскурзії русиньского реґіону на Словакії

На екскурзію меджі словацькых Русинів завитали в днях од 5-го до 8-го авґуста Русины з Мадярьска. 38 Русинів з Будапешту, Мішколца і околіці – од дітей, молодежі аж по найстаршых найперше навщівили в Пряшові Словацькый народный музей – Музей русиньской културы, де собі попозерали сучасну експозіцію музею, выслухали  інформації о експонатах, о історії, културі і традіціах словацькых Русинів од його директоркы ПгДр. Олґы Ґлосіковой, ДрСц. Окрем того, мадярьскы Русины на челі з Віктором Крамаренком, председом Вседержавного русиньского самоуправліня в Будапешті, проявили інтерес о будучу сполупрацу, і такой высловили просьбу пожычіти на выставку до Мадярьска макеты деревяных церьковок і фаребны вышывкы із найновішой выставкы ґобелінів. Директорка їм дала згоду з тым, же як ся буде реконштруовати будинок музею, вшыткы експонаты, о котры буде інтерес, можуть быти запожычены на выставкы ку нашым Русинам за граніці.

В. Крамаренко, інформуючі о културных подіах мадярьскых Русинів повів, же і они можуть быти напомічны своїм невеликым перевозным русиньскым музейом, богатов русиньсков бібліотеков, образами русиньскых малярів. Кебы быв інтерес о їх експонаты (інформації о них передав директорці і на ЦД), можуть таксамо пожычіти на выставку.

Потім мадярьскы Русины зашли і до Ґрекокатолицького храму святого Йоана Крестителя в Пряшові, в далшых днях перешли до свідницького реґіону, на Дуклю, завитали і до Музея модерного уміня Енді Варгола в Меджілабірцях а наконець і до прекрасного Бардейова. Екскурзію мадярьскых Русинів в рамках своїх проєктів зорґанізовало Вседержавне русиньске самоуправліня в Будапешті на челі із його председом і ґарантом проєкту Віктором Крамаренком, котрый водив своїх членів по русиньскім реґіоні Словакії.

Як повів В. Крамаренко, в Мадярьску жыє 13 народностных меншын, меджі нима і русиньска меншына, котрау 2011-ім році при зрахованю жытельства зазначіла нарост своїх членів. До русиньской народности ся приголосило  3882 Русинів, а то значіть о 1812 людей веце, як у 2001-ім році (тогды їх было лем 2070).

На знак того, же ся мадярьскым Русинам у нас любило, В. Крамаренко обіцяв привести на Словакію і далшых Русинів з Мадярьска.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА