Маґія в Карпатах

Карпаты то маґія. Знают тото вшыткы – тоты што ся в них родили, а і тоты, што іх до них фурт серце кличе. Найбільше гейбы про них мриют Русины зо Зъєднаных Штатів Америкы, бо по правді – то они мают зо вшыткых розселеных по світі Русинів найбільший дистанс, жебы прити на рідну землю.

Прото, 20. листопада/новембра т.р. o 15.30 год. Карпаторусиньскє Общество в ЗША просит на презентацию, котра пройде в штаті Вірджінія, а посвячена буде темі маґічных вірувань нашых предків, жыючых в Карпатах на своій рідній земли. Стрічу поведе др Патриция Крафчік (Dr. Patricia Krafcik), яка представит ону маґію русиньскых сел, котра часто – так в істориі, як і тепер – служыт досліджыням ріжных науковців. Так і на реченій стрічы прелеґентка однесе ся до прац фольклористів: росийского – Петра Богатырєва, та украіньского – Михайла Коцюбиньского.

Карпаты то єдны з найбільшых гір в середній Европі, котры находят ся в границях осмерых держав: Австриі, Чех, Польщы, Словациі, Угорщыны, Украіны, Румуніі та Сербіі. Іх пілнічна част то територия Карпатской Руси – ґеоґрафічного і етнічного жытлиска Карпатскых Русинів. Днес, в рамках історичной Карпатской Руси мож выділити три більшы реґіоны: Підкарпатску Русь (полудньово-східня част), Пряшівску Русь (полудньова част) і Лемковину (пілнічна част), котры находят ся в границях Польщы, Словациі, Украіны, входячы тіж в обшыр днешніх Мадяр і Румуніі.

Деталі дотуляючы стрічы – за мотузком.