Маґочій в Ужгороді одпрезентує книжку о формованю народного самоусвідомліня на Підкарпатьскій Руси

Лем недавно ужгородьске Выдавницьтво Валерія Падяка перевыдало на україньскім языку америцькый бестселер з пера русиньского вченого проф. Павла Роберта Маґочія.

Іде о книжку, котра вышла першый раз в америцькім Гарварді у 1978-ім році під назвов The Shaping of а National Identity: Subcarpathian Rus’.

Книжка Маґочія о формованю народного самоусвідомліня на Підкарпатьскій Руси свого часу, кедь была выдана по анґліцькы, выкликала „інтерес в кругу понад півміліоновой русиньской громады США і посеред науковців, політіків, етнолоґів Северной Америкы і Европы (окрім Совітьского союзу, де книжка не мала жадной шансы быти выданов,“ інформовав нашу редакцію выдаватель Валерій Падяк.

Свіжа україньска верзія з понад 750 сторінками під назвов Підкарпатська Русь: формування національної самосвідомості (1848-1948) є другым доповненым выданьом, котрому зробив спередслово доц. Володимір Феніч, к.н. Перше выданя той книжкы по україньскы появило ся іщі у 1994-ім році.

Моноґрафія Маґочія зосереджать увагу на шпеціфічны особливости формованя карпаторусиньской народной ідентіты на Підкарпатьскій Руси почас цілого столітя – од періоду Весны народів у 1848-ім році, аж до завершіня Другой світовой войны, коли было Підкарпатя анектоване Москвов і приєднане до совітьской Україны.

Як інформовав Валерій Падяк, выдавницьтво планує зорґанізовати серію презентацій новой книжкы за участи автора. Перша стріча з Павлом Робертом Маґочійом одбуде ся в Ужгороді 2-го септембра 2021-го року. Проходити буде в чіталній салі Закарпатьской областной універзалной бібліотекы імени Ф. Потушняка і зачаток презентації є о 16.00 год.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА