Маґурич ремонтує цмонтір в Грабі і в Панкній

В днях од 2. до 16. серпня т.р. Стоваришыня Маґурич ремонтує придорожны кресты і капличкы в Грабі і в Панкній і кєд тото чытаме, то видиме: Маґурич ремонтує. Значыт ся – они. А чом не: я, Ты, мы…? Чом то все они, а не мы занимаме ся тым што наше? А прецін Стоваришыня Маґурич то власні я, Ты, мы, они – то каждий з нас, то каждий, хто лем хоче помочы сохранити історию. Тым разом буде то істория наша – лемківска. Але нихто не буде входил в тото, як тота лемківскіст єст понимана, то непотрібне. Рахуют ся лем ефекты роботы. А они сут барз легко видочны – крест, котрий лежал деси в потраченых кавальцях, спільном роботом – стоіт і уж нихто не перейде обонятно коло того міцся. Може ся навет і задумат чом тот крест там, як раз, стоіт, хто го поставил, коли? Такых звідань може быти веце і веце. І о тото же іде. Спільном, соспільном роботом можеме довести, же лемківска істория і культура, то не лем вакацийны фестівалі і фольклорны ансамблі… хыбаль, же лем о тото нам власні іде?

фот. © Стоваришыня Маґурич

Стоваришыня Маґурич то орґанізация нон-профіт, котра занимат ся ремонтуваньом і ратуваньом пред знищіньом забытків сепульклярной штукы, головні на обшыри полудньовой і полудньово-східной части Польщы. Початкы Маґурича то іщы 1986 рік, а першы ремонтовы таборытаборы орґанізуваны были в рамках проєкту Надсаня (орґанізаторами были Станіслав Криціньскій і Шымон Моджеєвскій), пак еволювал, найперше в Неформальну Ґрупу Камінярів Маґурич, а потім в зареґіструване Стоваришыня Маґурич. Основательом, орґанізатором, ведучым – ядром Стоваришыня, єст Шымон Моджеєвскій.

Цілю таборів єст незмінні ратуваня, інвентаризация і документация сепульклярной штукы, крестів і капличок та вшыткых інчых елементів церковной штукы, якы остают лишены без опікы. През більше як 20 років діяльности зорґанізуваных остало більше як 70 таборів, на котрых выремонтувано більше як 1800 памятників, крестів і інчых объєктів малой сакральной архітектуры.

Жебы взяти участ в ремонтовым таборі, орґанізуваным Стоваришыньом Маґурич, не треба быти членом Стоваришыня, старчыт лем скорше ся зголосити (пиште на адрес stowarzyszenie@magurycz.org), а пак приіхати на місце. Звертаны сут кошты доізду, а на місци забезпечане єст выжывліня і спаня.