Малий словник лемківского села Бортне

Кіньцом минулого рока на выдавничым рынку явила ся нова пуликация, котра певно заінтересує не лем языкознавців – є то Малий словник лемківского села Бортне. Під такым наголовком вказала ся, заповідана од долшого часу, найновша книжка авторства проф. Януша А. Ріґера. Печатаний Выділом «Артес Лібералес» Варшавского Університету словник чыслит 262 страны формату Б5 і 4300 госел. Опрацуваний был з материялу збераного проф. Ріґером головні в 1995 році – з награнь реалізуваных разом з Малґожатом Слонь-Новачек в селі Бортне на Лемковині і в Лісци на заході, де были выселены Бортняне вчас Акциі Вісла. Словник документує язык найстаршого поколіня кінця ХХ ст. Вказує не лем слова і приміры іх хоснуваня, але приносит тіж інформациі тыкаючы традицийных предметів, народных звыків, будовы хыжы, ци того, што і коли ся іло, як і де ся бавлено/гуляно, або знаня про метаня вроків.

Проф. др габ. Януш Ріґер (вр. 1934 р. в Кракові) – польскій языкознавця і славіста. В обшыри його науковых досліджынь і заінтересувань находит ся і лемківскій язык. Выкладал на Ягайлоньскым, Варшавскым, Лодзкым Університететах, робил в Інститутах Славістикы і Польского Языка Польской Академіі Наук. Єст членом вельох науковых і редакцийных колективів. Єст автором і редактором чысленных языковых публикаций. З обшыри лемківского языка печатал м.ін. такы публикациі як: Leksyka środkowej Łemkowszczyzny (1979), Wyrazy „łemkowskie” i ich zasięgi (1981), Słownik gwary Łemków z okolic Grybowa (1988), Słownictwo i nazewnictwo łemkowskie (1995), Leksyka i onomastyka Łemkowszczyzny (1995),  Dwa drobiazgi ze słowotwórstwa łemkowskiego (1997) та вельо інчых.