Малярство Штефана Телепа на выставі в Ґорлицях

В Ждыни на Лемковині жыє Штефан Телеп, знаний сучасний непрофесийний лемківскій маляр, якій навязує в своій творчости до штукы Никыфора. 2. серпня/авґуста т.р. в Польско-Словацкым Домі ім. Д. Юрковича в Ґорлицях одбуде ся вернісаж выставы того артисты.

Вродил ся Штефан Телеп в 1957 році в Ждыни, там тіж фурт жыє і малює. Простір верхів Лемковины одзеркалят ся в його творчости. Образы полны сут простых люди зо села, поміщеных в урокливых горах Низкого Бескіду ци во внутрі лемківскых хыж. Початково фасцинувал ся фотоґрафійом, обрабляньом дерева, різбом, аж в кінци олійне малярство остало його пасийом. Од 1992 рока єст членом Клюбу Штукы при Ґалериі Штукы Двір Карвациянів в Ґорлицях. Бере участ в шторічных артистичных переглядах Клюбу і малярскых пленерах.

Своі образы презентувал на чысленных індивідуальных та ґруповых выставах м.ін. в Ґорлицях, Кракові, Варшаві, Ліґници, Креници, Вроцлаві і поза Польщом, головні на Словациі, напр. в Меджелабіряцх, Пряшові, Свиднику і Бардийові. Його образы находят ся в вельох приватных колекциях на обшыри Польщы, Німец, ЗША, Канады, Австралиі ци в Музею Модерной Штукы Енді Варголя в Меджелабірцях.

Діла Штефана Телепа были доцінены в світі професийной штукы, напр. признано му нагороду ім. Альфреда Длуґоша, фундувану бургомайстром міста Ґорлиці, выріжніня Ґорлицкого Сальону ци І місце на рівни з Мирославом Потомом на Бієнале Наівной Штукы і Арт Брут Польско-Словацкого Погранича ім. Е. Сутора.

Ґорлицка выстава потырват до 31. серпня/авґуста. Вернісаж – 2. серпня/авґуста о 17.00 год.