Малый каштель в Снині уж обновленый

Місто Снина закінчіло реконштрукцію такзваного малого каштеля, єдной із штирьох народных културных памяток в історічнім ареалі міста. Інформовала о тім аґентура TASR.

Окрім Дому служебницьтва, як тот обєкт євідує Памятковый уряд Словацькой републікы, ревіталізовала ся і часть історічного парку, котрый є в сусідтві будинку. Выникла там одпочінкова зона з озером.

Снина реалізовала реконштрукцію малого каштеля вдяка проєкту черезгранічной співпраці проґраму ENI, в котрім має за партнера підкарпатьске місто Хуст. Реконштрукція проходила єден рік. В зреконштруованій будові хоче самосправа реалізовати творчі варштаты про діти, але і іншы варштаты про вшыткы віковы катеґорії. В пивнічных просторах ся мають презентовати локланы продукты, включно їх выробы.

Ревіталізація околіці малого каштеля в історічнім парку, яка была фінанцована з підпоров проєкту черезгранічного проґраму Interreg, обсяговала обнову озера, котре было зроблене у 19-ім столітю, і было ліквідоване почас комуністічного режіму, а так само выбудованя алтанку і дакілько ходників.

Дім служебницьтва збудованый на початку 19-го столітя реконштруовали остатній раз в 1950-ых роках. Пак будинок аж до 1970-го року служыв на освітні цілі.

Фото: TASR.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА