Маме одповід од Міністерства Середовиска!

24. серпня/авґуста 2015 р. в статі Польскє міністерство дефініює «остатніх Лемків» написали сме на нашым портали о контроверсийній ґрафіці, котра явила ся на фейсбуковым фанпейджы Міністерства Середовиска. В рамках ґрафічной сериі афішів, інформуючых о нацийoнальных парках в Польщы, міністерство написало о Маґурскым Нацийональным Парку як о обшыри, де жыют остатні Лемкы.

По вельох майлях, котрых достали сме од хоснувателів порталю лем.фм, віруючы, же то лем хыба і не обвиняючы никого о замірену діяльніст против Лемкам, звернули сме ся до Міністра Середовиска з писмом, в котрым вказуєме тото речыня:

Достали сме уж одповід на тото писмо, в котрым прес-секретар Міністерства Середовиска, Катажына Пільщыньска, перепрашат за схоснуване выражыня, котре не мало ціли буд-кого дискримінувати, ани выкликувати неґатывных емоций.

Дякуєме за вражливіст і надієме ся на тото, же подібны речыня не будут ся являти в інтернеті, а кєд треба буде помочы зредаґувати, або сконсультувати деякы тексты – поможеме. Дякуєме тіж інтернавтам за увагу. Нашом мрийом єст, жебы такы речыня нияк і ниґде ся не являли, але кєд уж – присылайте іх до нас на адрес radio@lem.fm. Кєд мате дяку, займеме ся тым в Вашым імени, бо таку же місию і ролю маме мы – меншыновы медиі.