Марка – на своім

На ювілей 25 років од реактивациі Руской Бурсы і 5 років од першой емісиі радия Лем.фм пришло много гости, домашні і тоты покамарачены, котры нас знают і люблят ґу нам приходити. В суботу, 18. червця/юнія 2016 р., пришла і найбарже знана в нас русиньска артистка з Пряшова – Мария Мачошкова. Была нас потішыти своіма піснями і зачарувати голосом.

Уж сам єй вхід в порогы бурсы выкликал несподивані великій ентузиязм публикы, долгы і горячы брава. А чом аж так тепло было приняте Лемками єй зъявліня в Ґорлицях? Думам, же зато, же Мария Мачошкова єст співачком леґендарном. І што єй голос якысым чудом приходил раз за час, навет в правильні минулых часах запертя в обгородженых і стереженых осібных «демо-народных» заграницях, выґумуваня з істориі Русинів, бороніня признавати ся, писати і голосити ся за такых, якых нас выховали і вывчыли няньове і мамкы. Незіндоктринуваных і боронячых свою необмануту достоменніст. Тілько, на кілько треба, по цілій Лемковині, розходил ся єй спів завдякы радийовым реляциям высыланым з Пряшова. Вельо разів стрічали сме єй на чысленных фестівалях, ци на михалівскій ватрі, лем же товды, коли сама велика Марка пришла і станула перед нами, найближе як ся лем даст, коли сме взріли, же она не зза семох гір, лем гейбы така, як і мы самы, коли през недостасток бурсяного простору станула на піл метра перед публиком і заспівала просто до своіх очаруваных слухачів, то было мож почути, же вартало ждати. Што сме ся в кінци діждали.

Мария Мачошкова єст леґендом на Лемковині, серед Лемків. Єй співанкы, хоц добрі вшыткы познаєме, то заєдно бы сме іх слухали, співали і тішыли ся нима. А каждий може найти тоту свою облюблену, без котрой си ани не уявлят свойой еґзистенциі в лемківстві.

Артистка лишыла для бурсяной бібліотекы і архіву прекрасний дарунок – платню DVD з награнями своіх выступів для чехословацкой і словацкой телевізиі. Дякуєме сердечні! До стрічы як найскорше.