Меджі Бардейовскыма Купелями і Криницьов зачінать ходити реґуларно автобус

Пряшівскый самосправный край (ПСК) запроваджать од 1-го юла 2023-го року автобусове споїня меджі Бардейовскыма Купелями і Криницьов у Польщі. Денный автобус буде ходити на трасі Бардейовскы Купелі – Бардейов – Криниця.

Іде о пілотный проєкт, котрый має підпорити черезгранічный транспорт і турізм. Путуючі автобус будуть годны хосновати двараз денно в каждім напрямі. З Бардейова до Криниці ся дістануть за 45 минут.

Выгодне і про жытелів пригранічных сел

„Перепоїня словацького і польского приграніча є про наш край вызначнов пріорітов, зато я барз радый, же ся нам подарило выбавити автобусове споїня до Криниці,“ повів председа ПСК Мілан Маєрьскый.

За його словами часы одходів автобусів суть наставлены так, жебы мож было абсолвовати єднодньовы вакації польскым турістам на Словакії, як і словацькым в Польщі. Вдяка тому, же автобусы підуть цілый рік, хосновати їх будуть годны і жытелі пригранічных сел в рамках штоденных потреб.

Автобус буде, як сьме споминали, ку діспозіції в каждім напрямі двараз за день, і ціла траса Бардейовскы Купелі – Бардейов – Криниця буде тырвати єдну годину.

Путуючі автобусом будуть годны хосновати заставкы в Бардейовскых Купелях, на штації і заставках у Бардейові, в Мокролузі, Рокытові, Тарнові, Курові, Тыличу коло головного розпутя, в центрі Криниці, як і на желізнічній штації в Криниці, де мож переступити на автобусы і влакы в рамках Польщі.

Хотять притягнути турістів

„Мы рады, же вдяка співпраці з Пряшівскым самосправным крайом маєме таке меджінародне споїня, котре скапчало дві купельны міста і нашым купельным гостям уможнить спознати польскый бік і Кирницю. А може тото нове споїня принесе і новы ідеї, што бы сьме могли у нас в Бардейовскых Купелях выліпшыти. Тішыме ся, же до нас притягнеме польскых турістів і вкажеме їм, якы нашы купелі суть красны,“ повів председа представенства Бардейовскы Купелі а.к. Ярослав Комора.

„Бардейов і Кирниця суть важныма купельныма центрами і центрами турістічного руху, што творить значный сінерґічный потенціал. Вірю, же концепт реґуларного черезгранічного транспорту собі поступом часу найде достаток путуючіх, і помоче тым акцелеровати співпрацу на уровни окремых особ і бізнісовых субєктів зо вшыткыма економічныма, културныма і соціалныма бенефітами про реґіон,“ доповнив жупан Маєрьскый.

Што до ціны листків, платить штандардна таріфа примістьского транспорту включно знижок цін, котры люди знають з автобусового транспорту в рамках IDS Východ, значіть в Пряшівскім і Кошыцькім краю. Заплатити буде мож як в готовости, так і банкоматовов картов у автобусі.

ПСК веде далшы їднаня з Малопольскым воєводством о запроваджіню далшых автобусів в слідуючіх роках. Єднов з можливостей є автобус Новый Тарґ – Спішска Нова Вес – Червеный клаштор, котрый бы мало забезпечіти Малопольске воєводство у 2024-ім році.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА