Памят о Богдані Ґамбалю (26.02.1965 – 02.07.2020)

2. липця/юлия минула ся 6. річниця смерти бл. п. Богдана Ґамбаля, долголітнього шефредактора нашого радия, але предовшыткым одданого лемківского активісты і вірного сына Лемковины.

Памят о Покійным єст плекана каждого рока, не лем в річницю смерти, але тіж при нагоді Дня Русинів Польщы (5. грудня/децембра), коли то члены Стоваришыня Лемків приходят на любіньскій цмонтрів.

В 6. річницю смерти чест Покійному оддали Ведучый Головного Заряду Стоваришыня Лемків (ГЗ СЛ) Андрий Копча, Секретар ГЗ СЛ Севериян Косовскій та Член ГЗ СЛ Богдан Копча. Севериян Косовскій представлял тіж Стоваришыня «Руска Бурса» в Ґорлицях, котрого є членом та репрезентувал редакцию медияльной ґрупы ЛЕМ.фм+.

«Покійный был членом – основательом Стоваришыня Лемків, стоял за реактивацийом і розвитком Стоваришыня «Руска Бурса» в Ґорлицях та был думкодавцьом першого лемківского радия ЛЕМ.фм» – пише в своім комунікаті Стоваришыня Лемків.

На Лемковині памят о Богдані Ґамбалю буде молитовно припоминама, як стало ся уж традицийом, богослужыньом на Святій Горі Явір. Тогорічна заупокійна Літургія буде в 4. липця/юлия, а пак пройдут акциі в Ґорлицях, з нагоды 35 – літя реактивациі Общества «Руска Бурса», што могло в 1991 р. зъістити ся завдякы одданости справі молодого товды, 26 – літнього Богдана Ґамбаля. Пак його діяня довели і до того, што в 2009 р. офіцийно історична будівля ґорлицкой бурсы вернула в первістны рукы – Лемкам.

Вічна Тобі Памят, Богдане!