Полонины будуть поділены до чотырьох зон

Народный парк Полонины (НП Полонины) буде мати по зонації 32 809 гектарів. Зона А із пятым – найвысшым ступньом охраны, бы мала творити 19,1 процента теріторії. Выходить то із пропозіції зонації, котру зробило Міністерство жывотного оточіня Словацькой републікы.

Як інформовала пресова аґентура TASR, словацька влада тоту пропозіцію схвалила на своїм засіданю 1-го юла 2026-го року. Зонація Народного парку Полонины здобуде платность 15-го юла того року. Дакотры установліня аж 15-го юла 2056-го року.

Выникнуть чотыри зоны

Полонины будуть по зонації поділены до чотырьох зон. Зона A буде мати 6293 гектарів. 1718 гектарів буде мати подля резорту зона B із четвертым ступньом охраны, што творить 5,24 процента теріторії НП Полонины. Зона C із третім ступньом охраны буде творити 68,3 процента. Другый ступень охраны буде в зоні D, котра буде мати 2375 гектарів.

„НП Полонины перекрывать ся із семома народныма природныма резерваціями, із 15-ма природныма резерваціями, і єднов природнов памятков. По схваліню зонації НП Полонины будуть тоты хранены теріторії зрушены. Охранна область НП Полонины не буде ся перекрывати із народнов сістемов храненых теріторій,“ конштатовало міністерство.

До теріторії НП Полонины пропонує резорт жывотного оточіня приєднати і теріторію природной резервації Рыдошова, котра того часу є з векшой части в рамках теріторії Храненой країнной области Выходны Карпаты. Резорт припомянув, же Рыдошова є частков локаліты світовой природной дідовизны UNESCO – Стары буковы лісы і буковы пралісы Карпат і іншых реґіонів Европы.

„Цільом выголошіня народного парку є забезпечіти охрану природных процесів і прязный стан предметів охраны народного парку, котрыма є 22 (із тото шість пріорітных) біотопів европского значіня, 41 видів рослин европского і народного значіня, 97 видів жывотин европского і народного значіня, 48 видів птахів,“ пояснило міністерство.

Меджінародна біосферічна резервація

Майже ціла теріторія НП Полонины є частков европской сістемы храненых теріторій Natura 2000. Цілый народный парк є од 1992-го року частков словацько-польско-україньской Меджінародной біосферічной резервації Выходны Карпаты, котра є у світовій сіті UNESCO.

Фото: FB/NP Poloniny.