Меджілабірці хотять обновити влакы на Україну

Підпорити розвиток турізму в пригранічнім словацько-польско-україньскім реґіоні бы представителі містных самосправ хотіли і посередництвом обновліня влаків на штреці першой угорьско-галічской желізніці.

Меморандум о співпраці за словацьку сторону кінцьом першого фебруарового тыждня 2022-го року підписав пріматор міста Меджілабірці Владислас Вышньовскый. Інформовала о тім аґентура TASR.

Ку обновліню желізнічного споїня меджі Польщов і Українов ся міністры обидвох держав завязали до кінця того року. Як повів Вышньовскый, Україна ся посередництвом сового міністра завязала заінвестовати до свойой части штрекы і дати єй до кінця року до ходу. Обновлена штрека буде на трасі од польского міста Устрикы Нижні через україньску Смилньницю, Хирів, Нижняковиці до Перемышля.

Словацька сторона чекать на зліпшіня пандемічной і ґеоплітічной сітуації. Споїня із Словакійов буде через Лупківскый тунел до Меджілаборець. На стрічі представителів пригранічных самосправ і меншых теріторіалных цілків ся мали сіґнатарі доїднати на тім, же буде дана до ходу ціла штрека од Меджілаборець до Львова.

За Словами Вышньовского місто Меджілабірці хоче быти до того закомпоноване і од обновліня влаків очекує головно розшыріня можливостей про турістічный рух.

„О тім замірі мы вже з полськов сторонов діскутовали, но актуално о даній темі не їднаме з причіны коронавірусу і напруженой сітуації меджі Російов і Українов,“ повіла про аґентуру Міріяма Швікругова з одділіна комунікації Міністерства транспорту і будованя Словацькой републікы з тым, же по „выясніню сітуації“ є резорт приготовленый вєдно глvядати рішіня на запроваджіня такых влаків.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА